कवि विप्लव प्रतीकले हाइकु संग्रह सार्वजनिक गरेका छन्।
विप्लवको नयाँ पुस्तक 'शाडेनफ्रोएडा' शनिबार साहित्यिक जमघटका बीच विमोचन गरिएको हो। संगीतकार न्ह्यु बज्राचार्य, अभिनेता सुनिल थापा र सांगीतिक अभियन्ता रिन्छेन योञ्जनलाई पुस्तक हस्तान्तरण गरेर लेखकले पाठकमाझ यसलाई पस्केको घोषणा गरेका थिए।
समारोहको सुरूवातै विप्लवले उपस्थितहरूको स्वागतमा रचना गरेको हाइकु सुनाएर गरेका थिए। पुस्तकमा जापानबाट उत्पन्न विधा हाइकुले नेपाली कवि विप्लवका मर्महरू समेट्दै अघि बढेको छ भने यसले दर्दको काव्यिक अभिव्यक्तिबाट मिल्ने सन्तुष्टि अर्थात जर्मनीको 'शाडेनफ्रोएडा' लाई आवरणमा राख्दै फराकिलो दायरामा विस्तार हुन खोजेको छ।
कविता संग्रह, गीत, उपन्यास, नाटक, निबन्ध, पत्रकारिता, सिनेमा, वृत्तचित्र, अनुवाद र विज्ञापनका क्षेत्रमा आफ्ना पदचापहरू छाड्दै आएका विप्लवले सुक्ष्म काव्यिक अभिव्यक्ति मानिने हाइकु संग्रह पहिलोपटक पाठक माझ प्रस्तुत गरेका हुन्।
'सन् २००६ तिर म यो विधासँग नजिकिएको हुँ' समारोहमा विप्लवले भने, 'कविता सुनाउन भक्तपुर गएका बखत ख्याल ख्यालमै लेखेको एउटा हाइकुले मलाइ यहाँ सम्मको यात्रा गराएको हो।'
तीन हरफमा जम्मा १७ अक्षरभित्र जीवन र दर्शनको उथलपुथललाई उतार्नुपर्ने यो माध्यमले शब्दको किफायत गर्दै सशक्त अभिव्यक्ति पस्कन सिकाउने लेखकले बताए।
यस पुस्तकका अक्षरहरु कम्प्युटरका लिपि नभई स्वयं विप्लवकै हस्ताक्षरबाट मुद्रित भएकाले पाठकले त्यसको रसास्वादन पनि गर्न पाउनेछन्।
पुस्तकमा अनुराग, सम्झना, खेद, दर्द, अश्रु, मनदह, सपना, जीवनध्वनि गरी आठ खण्डमा हाइकुहरू समेटिएका छन्, जसले भावहरूको आरोह अवरोहयुक्त यात्रा गराउँछ।
विप्लवको 'शाडेनफ्रोएडा' लाई पब्लिकेशन नेपालयले अडियो बुकका रूपमा पनि प्रस्तुत गर्दैछ। अर्थात पढ्ने पाठकले विप्लवका हस्ताक्षरमै पुस्तकको रसास्वादन गरेजस्तै सुन्ने पाठकले पनि कविकै स्वरमा त्यसको आनन्द लिन सक्नेछन्।
पुस्तकको चार सय ९५ रूपैयाँ मूल्य राखिएको यो किताबलाई नेपालयले भौतिक पुस्तक सँगसँगै ईबुकका रूपमा पनि बजारमा उपलब्ध गराएको छ। ईबुकको प्रतिलिपि थुप्रै डटकमबाट किन्न सकिन्छ भने संसारभरका पाठकले अमेजनबाट पनि खरिद गर्न सक्नेछन्।
