बलिउडको कालजयी फिल्म 'शोलेः द फाइनल कट' नेपालमा पनि प्रदर्शनमा आउने भएको छ।
फिल्म मंगलबारदेखि नेपालका हलहरूमा रिलिज हुने भएको हो। सन् १९७५ को 'शोले' ५० वर्ष पूरा भएको अवसरमा भारतसहितका देशमा शुक्रबारदेखि पुनः प्रदर्शनमा आएको थियो। नेपालमा फिल्म रिलिज हुने–नहुने अन्यौलताकाबीच अन्ततः सोमबार मात्रै हलहरूले फिल्मको अग्रिम टिकट बुकिङ खुलाएका हुन्।
फिल्मको नेपाल प्रदर्शनलाई लिएर दर्शकहरूमा समेत चासो थियो। क्युएफएक्स, आइएनआई, वान सिनेमाज, बिग मुभिज लगायतका ठूला मल्टिप्लेक्सहरूमा यसको बुकिङ खुलेको छ।
धर्मेन्द्र, अमिताभ बच्चन र हेमा मालिनी अभिनीत यो फिल्मले भारतमा ३ दिनमा करिब १ करोड ४० लाख भारू कमाएको छ।
'शोले: द फाइनल कट' मा सन् १९७५ मा सेन्सरका कारण प्रदर्शन हुन नसकेको मूल अन्त्य पनि समावेश गरिएको छ। फिल्मलाई फोर के रेमस्टर्ड गरी डब्ली ५.१ साउन्ड र मूल ७० मिमी स्वरूपमा प्रस्तुत गरिएको छ। दर्शकलाई उत्कृष्ट दृश्य र ध्वनिको अनुभव दिनका लागि यसो गरिएको हो।
रमेश सिप्पी निर्देशित 'शोले' मा धर्मेन्द्र, अमिताभ बच्चन, हेमा मालिनी, जया बच्चन, सञ्जीव कुमार र अमजद खानजस्ता दिग्गज कलाकारहरूको अभिनय छ। फिल्मका हरेक पात्रहरू अहिलेसम्म पनि दर्शकको मनमा बसेका छन्।
धर्मेन्द्रको निधनपछि यस क्लासिक फिल्मको पुनः रिलिजले भावनात्मक महत्व पनि प्राप्त गरेको छ।
'शोलेः द फाइनल कट' संस्करणको रनटाइम ३ घण्टा २९ मिनेट छ।
-1746009348.jpg)
