अमेजोन प्राइमको वेब सिरिज 'पाताल लोक' मा हाथीराम चौधरीको भूमिका निभाएका जयदीप अहलावत आफ्नो अभिनयले चर्चा बटुल्न सफल भए। त्यसपछि उनी लगातार राम्रो प्रोजेक्टमा देखिएका छन्। 'पाताल लोक' को सफलतापछि उनले दोस्रो भागको लागि आफ्नो पारिश्रमिक बढाएका छन्।
भारतीय सञ्चारमाध्यमका अनुसार उनले अघिल्लो सिजनमा लिएको पारिश्रमिकको तुलनामा ५० गुणा पारिश्रमिक बढाएका थिए।
जयदीपले सन् २०२० मा प्रदर्शनमा आएको सिरिजको पहिलो सिजनमा ४० लाख भारतीय रूपैयाँ पारिश्रमिकको रूपमा लिएका थिए। दोस्रो सिजनमा उनले २० करोड भारू पारिश्रमिक लिएको बताइएको छ।
हालै उनले आफ्नो पारिश्रमिकको बारेमा हिन्दुस्तान टाइम्ससँग कुराकानी गरेका छन्। 'यति धेरै थियो पैसा, मलाई नि भनेको भए हुन्थ्यो। म केही गर्थे यो पैसाले। छ चै कहाँ यो पैसा,' उनले भनेका छन्।
अमेजोन प्राइमले अभिनेत्री अनुष्का शर्मासँग मिलेर निर्माण गरेको सिरिजमा जयदीपसँगै इश्वक सिंह, अभिशेक बेनर्जी, स्वस्तिका मुखर्जी, निहारिका ल्यारा दत्तलगायतका कलाकारको अभिनय छ।
यो सिरिज १७ जनवरीमा प्राइम भिडिओमा रिलिज भएको थियो।
जयदीप अब सैफ अली खानको फिल्म 'ज्वेल थिफ' मा देखिनेछन्। यसपछि विपुल अमृतलाल शाहको एक फिल्ममा पनि देखिनेछन्।
