बलिउड अभिनेता आयुष्मान खुराना अभिनीत फिल्म 'ड्रिम गर्ल २' ले बक्स अफिसमा राम्रो व्यापार गरिरहेको छ।
'गदर २' र 'ओ माइ गड २' ले भारतको बक्स अफिसमा आक्रमक व्यापार गरिरहँदा 'ड्रिम गर्ल' ले पनि शानदार ओपनिङ गरेको छ। शुक्रबार फिल्मले १० करोड ६९ लाख भारूमा ओपनिङ गरेको हो।
योसँगै 'ड्रिम गर्ल २' आयुष्मान खुरानाको सबैभन्दा ठूलो ओपनर फिल्म बनेको छ। यसअघि उनको फिल्म 'बाला' ले १० करोड १५ लाख भारू कमाएको थियो।
हिन्दी फिल्म बजार विश्लेषक तरण आदर्शका अनुसार फिल्मले दुई २४ करोड ७१ लाख भारू कमाएको छ। १० करोड ६९ लाख भारूमा ओपनिङ गरेको फिल्मले दोस्रो दिन १४ करोड २ लाख भारू कमाएको हो।
राज शान्दिल्या लिखित तथा निर्देशित फिल्म 'ड्रिम गर्ल २' मा एकता कपूर र शोभा कपूरको लगानी रहेको छ।
फिल्ममा आयुष्मानसँगै अनन्या पाण्डे, परेश रावल, अनु कपूर, विजय राज, राजपाल यादव, सीमा पहवा, गोवर्धन अस्रानी, अभिषेक बनेर्जी, मन्जोत सिंह, मनोज जोशी, अनुशा मिश्रालगायत कलाकारको अभिनय छ।
आयुष्मान खुराना र भूमि पेडनेकरको मुख्य भूमिका रहेको फिल्म 'ड्रिम गर्ल' लाई दर्शकले रूचाएका थिए। यो फिल्म बक्स अफिसमा हिट सावित भएको थियो।
