बलिउड अभिनेता शाहरूख खानको फिल्म 'जवान' को पहिलो गीत सार्वजनिक भएको छ।
सोमबार रेड चिलीज इन्टरटेनमेन्ट युट्युब च्यानलमार्फत फिल्ममा समावेश 'जिन्दा बन्दा' बोलको गीत सार्वजनिक गरिएको हो। गीतको भिडिओमा शाहरूखको नृत्य देख्न सकिन्छ।
अनिरूद्ध रविचन्दरको स्वर र संगीत रहेको गीतमा शब्द इरशाद कमिलको छ। गीतको सुरूवातमा संवाद राखिएको छ जसलाई शाहरूखले नै तयार पारेका हुन्।
एटली कुमारले निर्देशन गरेको फिल्ममा शाहरूखसँगै नयनतारा, विजय सेतुपथी, दीपिका पादुकोणलगायत कलाकारको अभिनय छ। फिल्ममा गौरी खानको लगानी छ।
फिल्ममा शाहरूख डबल रोलमा देखिनेछन् भने नयनतारा पुलिस अफिसरको भूमिकामा देखिनेछिन्। फिल्ममा दीपिका अतिथि भूमिकामा देखिन लागेकी हुन्।
जिके विष्णुले छायांकन गरेको फिल्मलाई रूबेनले सम्पादन गरेका छन्। हिन्दी, तमिल, तेलुगु भाषामा फिल्म ७ सेक्टेम्बरदेखि प्रदर्शन हुनेछ।
