बलिउड अभिनेता रणवीर कपूर अभिनीत फिल्म 'एनिमल' को नयाँ प्रदर्शन मिति तय गरिएको छ।
बलिउड फिल्म विश्लेषक तरण आदर्शले सामाजिक सञ्जालमार्फत नयाँ प्रदर्शन मिति सार्वजनिक गरेका हुन्। यो फिल्म डिसेम्बर १ अर्थात मंसिर १५ गतेदेखि प्रदर्शन हुनेछ।
यसअघि अगस्ट ११ मा प्रदर्शन हुने भनिएको थियो। ११ अगस्टमा सनी देओल र अमीषा पटेलको फिल्म ‘गदर २’ र अक्षय कुमारको फिल्म ‘ओ माई गड २’ प्रदर्शन हुँदैछ। एकैदिन ३ ठूला फिल्म रिलिज हुने भएपछि ‘एनिमल’ को रिलिज डेट सारिएको हो।
सन्दीप रेड्डी वांगाले निर्देशन गरेको फिल्म ‘एनिमल’ मा रणवीरसँगै रश्मिका मन्दना, बबी देओल, अनिल कपूरको मुख्य भूमिका छ। फिल्ममा रश्मिका रणवीरकी श्रीमतीको भूमिकामा देखिनेछिन् भने अनिल कपूर उनको बुवाको भूमिकामा देखिनेछन्। फिल्मको कथा निर्देशक सन्दीपले नै लेखेका हुन्।
एक्सन थ्रिलर फिल्ममा भुषण कुमार, प्रणय रेड्डी वांगा, मुरद खेतानी र कृष्ण कुमारको लगानी रहेको छ।
