पन्जाबी गायक गिप्पी ग्रेवाल र सोनम बाजवा अभिनीत फिल्म 'क्यारी अन जट्टा ३' ले नयाँ-नयाँ रेकर्ड राखिरहेको छ।
'क्यारी अन जट्टा ३' पहिलो दिन सबैभन्दा धेरै कमाउने पन्जाबी फिल्म बनेको छ। भारतीय सञ्चारमाध्य दैनिक भास्करका अनुसार फिल्मले घरेलु बक्स अफिसमा पहिलो दिन ४ करोड ५० लाख भारू कमाएको छ। अन्य पन्जाबी फिल्मको भन्दा यो दोब्बर कमाइ हो।
दोस्रो दिन फिल्मले ४ करोड ६० लाख भारू कमाएको छ। फिल्मले दुई दिनमा ९ करोड १० लाख भारू कमाएको हो।
'क्यारी अन जट्टा ३' ले विश्वव्यापी रूपमा पनि सबैभन्दा धेरै कमाउने पन्जाबी फिल्मको रेकर्ड राखेको छ। हिन्दी बजार विश्लेषक तरण आदर्शका अनुसार फिल्मले विश्वभरबाट दुई दिनमा २० करोड ८४ लाख कमाएको छ।
यो फिल्मसँगै कार्तिक आर्यन र कियारा आडवानीको फिल्म 'सत्यप्रेमकी कथा' प्रदर्शन भइरहेको छ। विश्वव्यापी रूपमा 'सत्यप्रेमकी कथा' भन्दा 'क्यारी अन जट्टा ३' को कमाइ राम्रो रहेको भारतीय सञ्चारमाध्यममा उल्लेख छ।
यो फिल्मको बजेट १० कराेड १२ लाख बताइएको छ।
स्मिप कान्ग निर्देशित फिल्ममा गिप्पी र सोनमसँगै बिन्नु ढिल्लो, कविता कौशिक, शिन्दा ग्रेवाल, गुरप्रीत घुग्गीलगायत कलाकारको अभिनय छ।
'क्यारी अन जट्टा' को पहिलो संस्करण सन् २०१२ प्रदर्शन भएको थियो भने दोस्रो संस्करण सन् २०१८ मा प्रदर्शन भएको थियो।
