रणवीर कपूरको फिल्म 'एनिमल' आगामी अगस्ट ११ मा रिलिज नहुने भएको छ।
हिन्दी फिल्म बजार विश्लेषक तरण आदर्शले सामाजिक सञ्जालमार्फत उक्त जानकारी दिएका हुन्। यो फिल्म अब कहिले रिलिज हुन्छ भनेर खुलाइएको छैन।
११ अगस्टमा सनी देओल र अमीषा पटेलको फिल्म 'गदर २' र अक्षय कुमारको फिल्म 'ओ माई गड २' प्रदर्शन हुँदैछ। एकैदिन ३ ठूला फिल्म रिलिज हुने भएपछि 'एनिमल' को रिलिज डेट सारिएको हो।
सन्दीप रेड्डी वांगाले निर्देशन गरेको फिल्ममा रणवीरसँगै रश्मिका मन्दना, बबी देओल, अनिल कपूरको मुख्य भूमिका छ। फिल्ममा रश्मिका रणवीरकी श्रीमतीको भूमिकामा देखिनेछिन् भने अनिल कपूर उनको बुवाको भूमिकामा देखिनेछन्। फिल्मको कथा निर्देशक सन्दीपले नै लेखेका हुन्।
एक्सन थ्रिलर फिल्ममा भुषण कुमार, प्रणय रेड्डी वांगा, मुरद खेतानी र कृष्ण कुमारको लगानी रहेको छ।
