प्रभास अभिनीत फिल्म 'आदिपुरुष' को प्रदर्शनअघि निकै चर्चा भएको थियो।
हनुमानका लागि हरेक हलमा एक सिट खाली राख्ने निर्माण टिमको निर्णयसँगै फिल्मको चर्चा चुलिएको थियो। तर फिल्म प्रदर्शन भएपछि विवाद भइरहेको छ। सस्तो भिएफएक्स र कमजोर संवादका कारण दर्शकहरूले फिल्मलाई नकारात्मक प्रतिक्रिया दिइरहेका छन्।
५० करोडमाथि ओपनिङ गरेको फिल्मलाई छैटौं दिनमा आइपुग्दा १० करोड भारू कमाउन पनि मुस्किल भएको छ।
भारतीय सञ्चारमाध्य दैनिक जागरणका अनुसार विश्वभरबाट फिल्मले ६ दिनमा ४१३ करोड भारू कमाएको छ।
फिल्मले पहिलो दिन ८६ करोड ७५ लाख भारू, दोस्रो दिन ६५ करोड २५ लाख, तेस्रो दिन ६९ करोड १ लाख, चौथो दिन १८ करोड, पाँचौ दिन १० करोड ७ लाख र छैटौं दिन ७ करोड ५० लाख कमाइ गरेको हो।
ओम राउतले निर्देशन गरेको फिल्ममा प्रभासलाई रामको भूमिकामा देख्न सकिन्छ भने सैफ अली खानलाई रावणको। कृति सेननले सीताको भूमिका निर्वाह गरेकी छन्।
