दक्षिण भारतीय अभिनेता कमल हसनलाई प्रभासको फिल्म 'प्रोजेक्ट के' मा भिलेनको भूमिका प्रस्ताव गरिएको छ।
निर्माताले फिल्मको प्रस्ताव राखे पनि उनले फिल्म साइन गरेका छैनन्। भारतीय सञ्चारमाध्यम हिन्दुस्तान टाइम्सका अनुसार निर्माता र हसनबीच कुराकानी भइरहेको छ।
भारतीय सञ्चारमाध्यममा यो फिल्म खेल्न निर्माता अश्विनी दत्तले उनलाई १५० करोड भारू पारिश्रमिक दिने चर्चा छ। तर हिन्दुस्तान टाइम्सको स्रोतका अनुसार उनीसँग पारिश्रमिकको कुरा भएको छैन।
'कमल सरसँग कुराकानी भइरहेको छ। उहाँले अहिलेसम्म जवाफ दिनु भएको छैन। यसै हप्ता कुरा टुंगिन्छ होला,' उनले भने।
नाग अश्विनले निर्देशन गर्ने फिल्ममा प्रसाससँगै अमिताभ बच्चन र दीपिका पादुकोणको मुख्य भूमिका छ। यो फिल्ममार्फत प्रभास र नाग अश्विन पहिलो पटक सहकार्य गर्दैछन्।
यो फिल्मको ७० प्रतिशन छायांकन पूरा भइसकेको छ।
पछिल्लो समय प्रभास अभिनीत फिल्म 'राधे श्याम' प्रदर्शन भएको थियो। तर यो फिल्म बक्स अफिस असफल सावित भयो। राधा कृष्ण कुमारले निर्देशन गरेको फिल्ममा प्रभाससँगै पूजा हेगडेको मुख्य भूमिका रहेको थियो।
अब उनी फिल्म 'आदिपुरुष' र 'सलार' मा देखिनेछन्। ओम राउतले निर्देशन गरेको फिल्म 'आदिपुरुष' जुन १६ अर्थात असार १ गतेदेखि प्रदर्शन हुँदैछ। फिल्ममा प्रभाससँगै कृति सेनन र सैफ अली खानको मुख्य भूमिका छ।
