बलिउड अभिनेत्री जाह्नवी कपूर स्पाइ थ्रिलर फिल्म 'उलझ' मा देखिने भएकी छन्।
सुधांशु सरियाले निर्देशन गर्न लागेको फिल्ममा जाह्नवीसँगै गुलशन देवैया र रोशन मैथ्यूको पनि मुख्य भूमिका रहनेछ।
बुधबार निर्माण टिमले दुई तस्बिर सार्वजनिक गर्दै फिल्मको औपचारिक निर्माण घोषणा गरेका हुन्।
भारतीय सञ्चारमाध्यमका अनुसार फिल्मको छायांकन मे महिनाको अन्तिमदेखि सुरू हुनेछ। फिल्ममा जाह्नवी, गुलशन र रोशनसँगै राजेश ताइलांग, मैयांग चांग, सचिन खेदकर, राजेन्द्र गुप्ता, जितेन्द्र जोशीलगायत कलाकारको अभिनय रहनेछ।
यो फिल्म एक आइएफएस अफिसरमा आधारित हुनेछ। फिल्मका कथा निर्देशक सरिया र परवेज शेखले तयार पारेका हुन्।
अभिनेत्री जाह्नवी जुनियर एनटिआरसँग फिल्म ‘एनटिआर ३०’ मा देखिनेछिन्। यो फिल्मबाहेक उनी अभिनेता राजकुमार रावसँग ‘मिस्टर एन्ड मिसेज माही’ मा देखिनेछिन्।
उनी पछिल्लो समय ‘मिली’ फिल्ममा देखिएकी थिइन्। फिल्मले बक्स अफिसमा राम्रो व्यापार गर्न नसके पनि उनको अभिनयको तारिफ भएको थियो।
