कुमार कट्टेल (जिग्री) निर्देशित फिल्म 'लाज शरणम्' गत बुधबारदेखि प्रदर्शनमा आएको छ।
प्रदर्शनअघि यो फिल्मले निकै चर्चा पाएको थियो। टेलिशृंखला 'सक्किगोनि' बाट आफ्नो छाप छाड्न सफल टिम फिल्म निर्माणमा होमिएको थियो।
फिल्ममा काठमाडौं महानगरपालिकाका मेयर बालेन शाहले 'नेपाल हाँसेको' बोलको गीत गाएपछि यसको चर्चा अझै चुलिएको थियो।
फिल्म रिलिजताका निर्माण टिमले समस्या झेल्नुपर्यो। फिल्ममा कलाकार सीताराम कट्टेल (धुर्मुस) ले निर्वाह गरेको पात्रको आवरण आफूसँग मिलेको भन्दै पूर्वमन्त्री मोहम्मद अफताब आलमले पाटन उच्च अदालतमा उजुरी दर्ता गरे। अदालतमा उजुरी परेपछि निर्माण टिमलाई फिल्मको प्रचार सामग्री प्रसारण नगर्न बताइएको थियो।
फिल्ममा पूर्वमन्त्री आलमलाई ठेस पुर्याउने कुनै विषयवस्तु नभएको भनेर सेन्सर पास भएपछि रिलिजको बाटो खुलेको थियो। ट्रेलर सार्वजनिक गर्ने तयारीमा रहेको निर्माण टिमले सिधै फिल्म रिलिज गर्यो।
ट्रेलरबिनै फिल्म सार्वजनिक गर्दा पनि दर्शकले फिल्मलाई पहिलो दिन भरपुर साथ दिए।
तर 'लाज शरणम्' ले रिलिज अगाडिको चर्चा कायम राख्न सकेको देखिँदैन।
विमानस्थलबाट सुन तस्करी गरेको कथा कर्णालीसँग जोड्न निर्देशक कुमार कट्टेलले धेरै मेहनत गरेका छन्। तर फिल्म औसत बनेको छ।
विमानस्थलमा काठको बाकसमा आउने शवको ठाउँमा सुन तस्करी गरेको दृश्यबाट फिल्म सुरू हुन्छ। नक्कली आमाबुबा बनाएर विमानस्थलबाट सुन तस्करी गर्न सफल देखिन्छ सोनालाल (सीताराम कट्टेल) र गज्जु दादा (अर्पण थापा) सहितको टिम।
यहीबीच एक पटक बाकसमा सुन नभएर शव नै आइपुग्छ। त्यसपछि सुन कहाँ हरायो भनेर खोजी सुरू हुन्छ।
सुन कता पुग्यो, कसरी सुनको ठाउँमा शव आइपुग्यो भन्ने कथा देखाउन धेरै नै समय लगाइएको छ। दर्शकलाई पट्यार लाग्न सक्छ।
हास्य टेलिशृंखला निर्माण गर्दै आएका 'सक्किगोनि' टिमको फिल्म भनेपछि दर्शकहरू हलमा मज्जाले हाँस्न पाइन्छ होला भन्ने आश लिएर जान सक्छन्। तर फिल्ममा हाँसो लाग्ने त्यस्तो कुनै खास कुरा भेटिँदैन।
फिल्मले कर्णालीको सुन्दरतासँगै कर्णालीको व्यथा समेटेको छ। यसलाई अझै सुन्दर बनाउने काम ब्याकग्राउन्ड म्युजिकले गरेको छ।
सीताराम कट्टेल, विजय बराल, अर्पण थापा, महेश त्रिपाठी, मुकुन्द श्रेष्ठ, विजय लामा, रेणुनाथ योगी, सागर लम्साल, हरि निरौला, अर्जुन घिमिरे, कमलमणि नेपाल, प्रियाना आचार्य, दयाहाङ राई र बुद्धि तामाङ लगायतको अभिनय छ।
थुप्रै कलाकारलाई समान महत्त्व दिन खोज्दा फिल्मको सन्तुलन भने बिग्रिएको भान हुन्छ। फिल्मको अन्तिमसम्म पनि मुख्य पात्र को हो भन्ने छुट्ट्याउनै मुस्किल पर्छ। मध्यान्तरअघि सागर लम्साल (बले) मुख्य पात्र हो कि भन्ने भान हुन्छ। मध्यान्तरपछि महेश त्रिपाठीलाई मुख्य पात्रका रूपमा देखाइएको छ।
महेशले सन्देश नामको पात्रको भूमिका निर्वाह गरेका छन्। उनले दमदार अभिनय गर्दै करिअरमा अर्को इँटा थप्ने काम गरेका छन्। उनीसँगै अभिनेत्री रेणुनाथ योगीको अभिनय पनि अब्बल देखिएको छ।
विजय बराल त यसै पनि आफ्नो हरेक भूमिकालाई न्याय गर्ने अभिनेतामा पर्छन्। 'पूर्णबहादुरको सांरगी' बाट सर्वाधिक चर्चामा रहेका उनले 'लाज शरणम्' मा पनि बलियो प्रस्तुति दिएका छन्।
समग्रमा कलाकारहरूको अभिनय फिल्मको राम्रो पक्ष हो। सीताराम कट्टेलको पात्र भने लाउड देखिएको छ।
फिल्ममा एक संवाद छ – म त ओभररेटेड कलाकार हो नि!
यो संवाद अर्जुन घिमिरे (पाँडे) ले बोलेका हुन्छन्। तर यो संवाद संयोगवस् सीताराम कट्टेलले निर्वाह गरेको पात्र सोनालालसँग चाहिँ मिल्न पुग्छ।
फिल्ममा राजनीतिका कारण कर्णालीको विकास हुन सकेन भन्ने असन्तुष्टि देखाइएको छ। तर यसको समाधान के गरेर हुन्छ, जनताले आफ्नो तर्फबाट के कस्ता प्रयास गर्न सक्छन् भनेर देखाउने प्रयास गरिएको छैन।
यद्यपि फिल्ममा गरिब र धनाढ्य परिवारको कथालाई एकै फ्रेममा समेट्ने प्रयास गरिएको छ। यसले दर्शकको मन छुन सक्छ।
फिल्मको क्लाइमेक्स भने चित्त बुझ्दो छैन। यसको दोस्रो भाग बनाउन कथा अधुरै टुंग्याइएको छ।
निर्माण टिमले दर्शकको चाहना बुझेर राम्रो फिल्म बनाएको दाबी गरे पनि र धेरै चर्चा पाए पनि 'लाज शरणम्' औसत बनेको छ। बक्सअफिसमा यसले कस्तो प्रदर्शन गर्छ भन्ने हेर्न चाहिँ बाँकी नै छ।
