लेखक अनुस्का सिलवालको काव्यसंग्रह ‘दि बर्डेन अफ ब्रिथ’सार्वजनिक भएको छ।
कात्तिक २२ गते काठमाडौंमा एक कार्यक्रम गरी सिलवालले उक्त काव्यसंग्रह सार्वजनिक गरेकी हुन्।
प्रेम, आत्मपहिचान, आन्तरिक संवेदना र मानवीय अस्तित्वको संवेदनशील गहिराइलाई समेट्ने यस कृतिले उनको साहित्यिक यात्राको गम्भीर र प्रभावशाली प्रारम्भलाई संकेत गरेको छ।
काठमाडौंमा जन्मे हुर्केकी २४ वर्षीया सिलवालले २०२३ मा भारतको केली स्कुल अफ बिजनेसबाट मार्केटिङमा स्नातक तथा मनोविज्ञानमा (माइनर) पूरा गरेकी छन्।
पेसागत रूपमा मार्केटिङ र स्टोरीटेलिङमा सक्रिय रहँदै आएकी उनका लागि लेखन सधैं आत्ममनन, अभिव्यक्ति र आत्मबुझाइको विश्वसनीय माध्यम बनेर आएको बताइन्छ।
बाल्यकालका डायरीहरूदेखि उनका प्रारम्भिक निबन्ध तथा लेखहरूसम्म, भाषा सधैं संसार बुझ्ने उनको माध्यम रहँदै आएको छ।
दि बर्डेन अफ ब्रिथमा समावेश ११७ कविताहरूले उनको संवेदनशीलता, अन्तर्दृष्टि, स्वबोध र भावनात्मक स्पष्टताको विभिन्न क्षणहरूलाई उजागर गर्छ।
पुस्तकको शीर्षक मनाङ यात्राका क्रममा एक उकालोमा रोकिएर श्वास लिँदा प्राप्त हुने दुई अर्थपूर्ण अनुभूतिबाट उत्पन्न भएको लेखक सिलवाल बताउँछिन्।
‘श्वास लिनु नै जीवनको प्रथम उपहार र त्यही साथमा बोकिएको गहनतम बोझ पनि हो। यही गहिरो रूपकले सम्पूर्ण कृतिको भावनात्मक सारलाई निर्धारण गर्छ।
पुस्तक विमोचन वरिष्ठ साहित्यकार प्राध्यापक गोविन्दराज भट्टराई तथा मण्डला बुक पोइन्टका माधवलाल महर्जनले संयुक्त रूपमा गरे।
दुवै अतिथिहरूले सिलवालको कृतिमा देखिएको काव्यिक सान्दर्भिकता, भाषिक सुक्ष्मता र अव्यक्त भावनाहरूलाई सुस्पष्ट रूपमा शब्दबद्ध गर्ने उनको क्षमता प्रशंसनीय रहेको उल्लेख गरे।
प्रारम्भिक समीक्षाहरूले पनि उनको आवाजको प्रामाणिकता र व्यक्तिगत यात्राको संवेदनशील अभिव्यक्तिले समकालीन पाठकहरूमा बलियो प्रतिध्वनि जन्माउने विश्वास व्यक्त गरेका छन्।
समारोहमा सम्बोधन गर्दै सिलवालले आफ्नो सृजनात्मक यात्रामा साथ र प्रेरणा प्रदान गर्ने गुरु, शिक्षक तथा परिवारजनप्रति हार्दिक आभार व्यक्त गरिन्।
उनले पुस्तक बिक्रीबाट आउने रकमको एक हिस्सा परोपकारी कार्यलाई समर्पित गरिने जानकारी दिइन्। सिर्जनशीलताको माध्यमबाट समाजमा सकारात्मक योगदान गर्न चाहेको बताइन्।
‘म आफूलाई पूर्णकालीन लेखक भन्दिन,’ उनले भनिन्, ‘तर लेखन सधैं मेरो मौन, आन्तरिक हिस्सा बनेर रह्यो। यो पुस्तक त्यही हिस्सालाई संसारसँग साझा गर्ने मेरो प्रयास हो। मेरा शब्दहरूले सुन्ने आकांक्षा राख्ने, बुझिन चाहने वा आफुलाई खोज्न चाहने कुनै पनि पाठकमाझ पुगून् भन्ने मेरो इच्छा हो।’
‘दि बर्डेन अफ ब्रिथ’ हाल काठमाडौंका प्रमुख पुस्तक पसलहरूमा उपलब्ध रहेको छ।
-1746009348.jpg)
