लेखक, निर्माता एवं अभिनेता दीपकराज गिरीले गायिकाद्वय एलिना चौहान र समीक्षा अधिकारीको अभियानको प्रशंसा गरेका छन्।
एलिना र समीक्षाले पछिल्लो समय आफूहरूको नीजि जीवनका कुरालाई लिएर अभद्र शब्द प्रयोग गर्दै कमेन्ट गर्ने प्रयोगकर्ताहरूको 'फेसबुक प्रोफाइल' सामाजिक सञ्जालबाटै सार्वजनिक गरिरहेका छन्। यो अभियानमा दीपकराजले उनीहरूको प्रशंसा गरेका हुन्।
शुक्रबार फेसबुकमा पोस्ट लेख्दै दीपकराजले दुवैजना आफूलाई मनपर्ने गायिका भएको उल्लेख गर्दै सुरूदेखि समीक्षाको साहसको पनि प्रशंसक भएको बताएका छन्।
आफूले समाज, परिवार र राष्ट्रका लागि काम गर्ने तर काम गर्नेहरूलाई नैतिकता सिकाउने, चरित्रमाथि औला उठाउने चलन देखिँदै आएको दीपकराजको भनाइ छ।
'यस्ता उश्रृङखलताविरूद्द साइबरमा गयो कानुन नै कमजोर, ठूला नेतालाई गाली गर्यो भने समातेर कारवाही सुरू गरिहाल्ने तर अन्य मानिसहरूलाई गरिएको गाली गलौचको त रिपोर्ट भए पनि कस्ले सुन्ने? सुने पनि वर्षौ लाग्ने, त्यसकै पछि लागिरहने फुर्सद कहाँ पाउनु फेरी,' उनले लेखेका छन्, 'यस्तो जटिल परिस्थितिमा, आफूमाथि खनिने त्यस्ता सामाजिक सञ्जालका फूर्सदिला गाली सम्राटहरूलाई तिमीहरूले सामाजिक सञ्जालमै उनीहरूका हर्कत उदांगो पार्ने जुन अभियान चलायौ, त्यो एकदमै प्रशंसनीय छ। दुवै जनालाई शुभकामना!'
