दर्शकले रूचाएको हास्य सिरियल 'गाह्रो छ हो' यतिबेला बन्द छ। यसको दोस्रो सिजनको केही भागपछि सिरियल बन्द भएको हो।
यो सिरियल बन्द भएसँगै यसका निर्देशक तथा कलाकार बेगम नेपाली (भटभटे माइला) ले नयाँ सिरियल दर्शकमाझ ल्याउँदैछन्।
उनले 'गाह्रो छ जिन्दगी' नाममा सिरियल ल्याउन लागेका हुन्। यो सिरियलको ट्रेलर यही बुधबार बेलुका सार्वजनिक हुँदैछ। सिरियलको शीर्षक गीत युट्युबमा सार्वजनिक भइसकेको छ।
नयाँ विषयवस्तु र नयाँ कलाकारसहित 'गाह्रो छ जिन्दगी' दर्शकमाझ ल्याउन लागेको बेगमले बताएका छन्।
बेगमकै लेखन रहने सिरियललाई प्रवेश पोखरेलले निर्देशन गर्दैछन्। सिरियल कहिलेदेखि प्रसारणमा आउँछ भन्नेबारे खुलाइएको छैन।
ट्रेलर सार्वजनिक गर्दै प्रसारण मिति जानकारी दिने तयारी छ।
'गाह्रो छ हो' सिरियल दर्शकमाझ निकै चर्चित थियो। यसले युट्युबमा सबभन्दा धेरै हेरिएको नेपाली सिरियलको रेकर्ड समेत कायम गरेको छ। 'गाह्रो छ हो' को एउटै एपिसोड (भाग १४) लाई युट्युबमा २ करोड १६ लाखभन्दा बढीपटक हेरिएको छ।
