राजेश हमाल अभिनीत फिल्म 'नरसिंहाः अवतार' शुक्रबारदेखि प्रदर्शनको दोस्रो सातामा प्रवेश गरेको छ।
राजेशको ८ वर्षपछिको कमब्याक यो फिल्म जेठ ९ गतेदेखि देशभरका हलमा प्रदर्शनमा आएको थियो।
फिल्म दोस्रो सातामा प्रवेश गरेसँगै निर्माणपक्षले पहिलो साताको ग्रस कलेक्सन सार्वजनिक गरेको छ। निर्माताको दाबी अनुसार फिल्मले ७ दिनमा २ करोड ४ लाख रूपैयाँ ग्रस कलेक्सन गरेको छ।
राजेश हमालले वर्षौपछि अभिनयमा कमब्याक गरेकाले निर्माण घोषणादेखि नै 'नरसिंहाः अवतार' लाई थप चासोका साथ हेरिएको थियो। यसमा समावेश गीत 'अच्छा लेकिन लण्डनको चिसोले समाउला' ले पनि चर्चा पाएको थियो।
दिवाकर भट्टराईको लेखन तथा निर्देशनमा बनेको यो फिल्ममा राजेशसहित सरोज खनाल, राज कटुवाल, नीति शाह, सनिशा भट्टराई, प्रशान्त ताम्राकार लगायतको अभिनय छ।
फिल्म रिलिजसँगै राजेशसहित अन्य कलाकार र निर्माण टिम दर्शक भेट्न हल–हलमा पुगिरहेका छन्। त्यसक्रममा हलमा पुग्दा राजेश हमालको क्रेज गज्जब देखिने गरेको छ। उनी पुगेका हलमा दर्शकले ताली र सिठ्ठीसहित स्वागत गरिरहेका छन्। राजेशसँग भेट्न र तस्बिर खिचाउन पनि दर्शकबीच तछाडमछाड नै चल्ने गरेको सामाजिक सञ्जालमा प्राप्त भिडिओ र तस्बिरमा देख्न सकिन्छ।
'नरसिंहाः अवतार' मा राजेश एक्सन अवतारमा छन्। एक्सन जनरामा रहेर प्रेम, परिवार र बदलाको कथामा फिल्म बनेको हो।
फिल्मको निर्माता नेम महर्जन, दीपक ढकाल, नरेन्द्र महर्जन र ध्रुव न्यौपाने हुन्।
