फिल्म 'परिवर्तन' निर्माण हुने भएको छ। फिल्म क्षेत्रमा तीन दशकभन्दा बढी समयदेखि सक्रिय निर्देशक विजय केरूङले यो फिल्म निर्देशन गर्नेछन्।
फिल्ममा अभिनेता सुशील श्रेष्ठ र अभिनेत्री अञ्जना बराइली प्रमुख भूमिकामा देखिने तय भएको छ। साथमा सुनील थापा, बुद्धि तामाङ, करिश्मा मानन्धर, आशा पौडेल, सुवास मेचे, पुकार भट्टराई, आएशा कार्की, गौतम तिवारी, यमनाथ खरेललगायत कलाकारहरूको पनि अभिनय रहनेछ।
दिब्यासी फिल्म्स प्रा.लि.को ब्यानरमा निर्माण हुने यस फिल्मका निर्माता दीपक सिवाकोटी हुन्। उनले नै फिल्मको कथा तयार पारेका हुन् भने पटकथा तथा संवाद शिवम अधिकारीले तयार पारेका छन्।
विजय केरूङले 'माझी दाइ', 'आमाको काख' लगायतका थुप्रै फिल्म निर्देशन गरिसकेका छन्। उनले यस नयाँ प्रस्तुतिमा एक इमानदार प्रहरी अफिसरको कथालाई केन्द्रीय रूपमा प्रस्तुत गरिने जनाइएको छ। कानुनप्रतिको कर्तव्य र प्रेमप्रतिको दायित्वबीचको संघर्ष फिल्मको कथा हुनेछ। फिल्मले नेपालको सिमाना सुरक्षाको संवेदनशीलता, भ्रष्टाचारको काला सञ्जाल, र गरिब, दुखी तथा असहाय जनताको पीडालाई देखाउने जनाइएको छ।
फिल्मको छायांकन निर्देशन शिव ढकाल, सम्पादन भूपेन्द्र अधिकारीले, द्वन्द्व निर्देशन श्री श्रेष्ठ, नृत्य निर्देशन कमल राईले तथा पोस्टर तथा पब्लिसिटी डिजाइन रोयल भीमसेन र ट्राइडेन्ट कन्सेप्टले गर्नेछन्। निर्देशकको सहायकका रूपमा नवराज शर्मा रहनेछन् भने प्रोडक्सन हेड अरूण रेग्मी हुन्।
'परिवर्तन' फिल्मको छायांकन आगामी हप्ताबाट सुरू हुने बताइएको छ। पूर्वी नेपालका विभिन्न जिल्लाहरूमा छायांकन हुने र यसै वर्षभित्र प्रदर्शनमा ल्याउने लक्ष्य निर्माण पक्षले लिएको छ।
'परिवर्तन' शीर्षकमा यसअघि पनि वि.सं. २०२८ सालमा फिल्म निर्माण भएको थियो, जसको निर्देशन हिरा सिंह खत्रीले गरेका थिए।
अब झन्डै पाँच दशकपछि पुनः यही नाममा अर्को फिल्म दर्शकमाझ आउन लागेको हो।
