अभिनेता राजेश हमालले फिल्म 'नरसिंहाः अवतार' मा काम गर्न यसको कथा र आफ्नो चरित्रले तानेको बताएका छन्।
सुरूमा यो फिल्मको अफर आउँदा उनी काम गर्ने मनस्थितिमा थिएनन्। तर निर्देशक दिवाकर भट्टराईसँगको बसाइँका क्रममा यसको कथावस्तु र आफ्नो चरित्र मन परेपछि काम गर्ने निर्णयमा पुगेको राजेशको भनाइ छ।
'विगतमा पनि फिल्मको अफरहरू नआएका होइनन्। र, फिल्म रफ्तारमा गर्ने वा फिल्म गरिहाल्ने भन्ने मनस्थितिमा म थिइन्,' बिहीबार काठमाडौंमा फिल्मको ट्रेलर रिलिज गर्न आयोजित कार्यक्रममा राजेशले भने, 'दिवाकरजीले जब यो प्रोजेक्ट ल्याउनुभयो। म खास्सै फिल्म गर्ने तयारीमा थिइनँ। उहाँले अफर ल्याइहाल्नुभयो गरिहालौं भन्ने मनस्थिति थिएन।'
उनले अगाडि भने, 'तर बसाइँको क्रममा कथा सुन्दाखेरी फिल्मको स्क्रिनप्ले जसरी ढालिएको छ, जसरी मेरो चरित्रलाई ढालिएको छ। मलाई लाग्यो कि यो बिन्दुमा यस्तो फिल्म, यो चरित्रमा आउन ठीक हुन्छ।'
फिल्ममा काम गर्ने सन्दर्भमा समयले पनि प्रभाव पार्ने उनको भनाइ छ।
'यो समयमा जुन किसिमको भूमिकामा म उत्रिन सक्छु, त्यो भूमिका नरसिंहाले उपलब्ध गराएको छ।'
कथा र पात्रपश्चात फिल्ममा काम गर्नमा टिमले पनि महत्वपूर्ण भूमिका खेल्ने राजेशले बताए।
उनले भने, 'यसमा सबै सहज व्यक्तिहरु ह्ुनुहुन्छ। धेरैजसो व्यक्ति त सहयात्री हुनुहुन्छ। केही नयाँ व्यक्ति हुनुहुन्छ, जो असाध्यै मेहनत गर्नुभएको छ।'
'नरसिंहा अवतार' राजेश हमालको ८ वर्षपछिको कमब्याक फिल्म हो। यसमा अभिनेता सरोज खनालको पनि अभिनय छ। राजेश र सरोज वर्षौपछि संगै देखिन लागेका हुन्।
राज कटुवाल, नीति शाह, सनिशा भट्टराई, नीर शाह, अर्जुन श्रेष्ठ, उषा खड्गी, दीपा शाही लगायतले पनि शीर्ष भूमिकामा अभिनय गरेका छन्।
बिहीबार रिलिज ट्रेलर यतिबेला युट्युब ट्रेन्डिङमा छ।
