अनिल बुढा मगरले निर्देशन गर्न लागेको फिल्म 'मितज्यू' मा अभिनेत्री स्मिता लामिछाने अनुबन्धित भएकी छन्।
अभिनेत्री लामिछानेको जन्मदिनको अवसर पारेर फिल्ममा अनुबन्धित गरिएको निर्माण टिमले जानकारी दिएको छ। निर्माता समेत रहेकी लामिछानेले '१२ सत्ताइस' बाट नेपाली फिल्ममा मुख्य अभिनेत्रीको रूपमा डेब्यू गरेकी हुन्।
स्मिताको निर्माण तथा अभिनय रहेको फिल्म 'आँखा' गतवर्षको असोजमा प्रदर्शनमा आएको थियो। यससँगै उनको मुख्य भूमिका रहेको फिल्म 'म राजेश हमाल' प्रदर्शनको तयारीमा छन्।
यो फिल्मको छायांकन आगामी मंसिरदेखि सुरू हुनेछ। हाल कथा लेखनको चरणमा रहेको 'मितज्यू' को मुख्य भूमिकामा यसअघि नै अभिनेता दयाहाङ राई र तेरिया फौजा मगर अनुबन्धित भइसकेका छन्।
जिएम मूभिज प्रोडक्सन र एबीएम सिने प्रोडक्सनको ब्यानरमा फिल्म निर्माण हुनेछ। आगामी चैत २७ गते नेपाली नयाँ वर्षलाई फिल्मको प्रदर्शन मिति घोषणा भइसकेको छ। महेश राईको लेखन रहेको फिल्मका प्रोडक्सन कन्ट्रोलर धन बहादुर राई हुन्।
यो टिमले निर्माण गरेको फिल्म 'घरज्वाइँ' गतवर्ष सुपरहिट भएको थियो।
