नयाँ कलाकारहरू लिएर बनेको फिल्म 'होस्टेल ३' ले राम्रो व्यापार गर्दै प्रदर्शनको ५१ औं दिन पुरा गरेको छ।
स्थापित कलाकार, ठूला ब्यानर र अपेक्षित फिल्म समेत फ्लप भइरहेको समयमा 'होस्टेल ३' ले यो सफलता पाएको हो।
फागुन २३ गते रिलिज फिल्मले काठमाडौंको रञ्जना सिनेप्लेक्समा उक्त उपलब्धि हासिल गरेको हो।
निर्माण पक्षले सोमबार रञ्जना हलमा सेलिब्रेसन कार्यक्रमको समेत आयोजना गरेको छ। निर्देशक सशान कंडेलले दर्शकहरूको मायाले यो सम्भव भएको बताए।
उनले सेतोपाटीसँग कुरा गर्दै भने, 'फिल्ममा पहिलो कामलाई नै यति माया गरिदिनुभयो। अब अर्को फिल्ममा अझ धेरै मेहनत गरेर यसमा भएका कमीकमजोरीलाई सुधारेर आउने जोश बढेको छ।'
'होस्टेल ३' मा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतको मुख्य भूमिका रहेको छ। माधव शर्माको पटकथा तथा संवाद लेखन रहेको फिल्मको निर्माता सुरेश कँडेल, कर्ण कार्की र गोविन्द अधिकारी हुन।
फिल्मले बक्स अफिसमा ५ करोडमाथिको व्यापार गरेको निर्माणपक्षले जनाएको छ।
