फिल्म 'कुस्ती' को छायांकन सकिएको छ।
काठमाडौं र आसपासका क्षेत्रमा छायांकनको ३९ दिनमा गीत बाहेकका दृश्य सकेर 'इन्डक्ल्याप' गरिएको निर्माता तथा निर्देशक अनिल योञ्जनले जानकारी दिए। उनका अनुसार प्रेम गरेता पनि स्वभाव भिन्नताले एकसाथ रहन संघर्ष गर्न बाध्य जोडीको कथालाई फिल्ममा दर्शकले देख्न पाउनेछन्।
उनले भने, 'कुस्ती एक अर्कासँग छुट्टिएर बस्न नसक्ने र सँगै रहन पनि नसक्ने मनका भावनाहरूको मधुर यात्रा हो। भावनात्मकतासँगै हास्यरसले भरिएको यो फिल्म प्रेम कथानक कमेडी ड्रामा हो।'
यो फिल्ममा अभिनेता धिरज मगर र अभिनेत्री मिरूना मगर शीर्ष भूमिकामा छन्। साथमा पुस्कर गुरूङ, लुनिभा तुलाधर, भोलाराज सापकोटा, दीकिला शेर्पा, रवीन्द्र झा, पुस्कर गुरुङ, राजाराम पौडेल, किरण केसी, लुनिभा तुलाधर, सूर्यमान लिम्बू, अरविन गुरूङ, रजनी गुरुङ, सुवर्ण थापा लगायत कलाकारहरूको अभिनय छ।
एमटीभीको चर्चित भारतीय रियालिटी शो 'स्प्लिट्सभिल्ला' सिजन ५ बाट चिनिएकी दिकिला शेर्पाको यो डेब्यु नेपाली फिल्म हो। सहरको कथा भएकाले काठमाडौं आसपासमा छायांकन गरिएको निर्देशक योञ्जनले बताए। 'दर्शकले धीरज र मिरूनाको जोडीबाट गर्ने अपेक्षालाई पूर्ण गर्ने काम गरेज छौँ', उनले भने।
उनले फिल्मको छायांकनकै क्रममा अन्तर्राष्ट्रिय वितरकबाट फिल्मको प्रदर्शन अधिकार खरिदका प्रस्तावहरू आइरहेको बताउँदै छिटै विदेश प्रदर्शन तय गर्ने जानकारी दिए।
फिल्ममा उमंग शाहीको छायांकन, मित्रदेव गुरूङको सम्पादन, दीपक शर्मा, अनिल योञ्जन, कल्याण सिंहको संगीत, शिशिर खातीको नृत्य निर्देशन छ।
'कुस्ती' आउँदो वर्ष विसं २०८२ को भदौमा प्रदर्शन हुनेछ। फिल्म काठमाडौंमा रिच इन्टरटेनमेन्ट र एप्पल इन्टरटेनमेन्ट तथा मोफसलमा एफडी कम्पनीले प्रदर्शनका लागि वितरण गर्नेछ।
