नेपाली फिल्म 'झिल्को' को गीत 'नाच पुतली' सार्वजनिक गरिएको छ।
शुक्रबार इन्टरनेटमार्फत सार्वजनिक गरिएको यो गीत मार्मिक भावनासँग जोडिएको छ, जसमा दुखी बालिकालाई फकाउँदै उसलाई खुसी बनाउने प्रयास गरिएको देखिन्छ। गीतमा आनन्द अधिकारीको शब्द, दिपक शर्माको संगीत र शाहिमा श्रेष्ठको स्वर रहेको छ।
गीतको भिडिओमा आश्मा विश्वकर्मा, चाहना पुन, आयुषी ढकाल, सुनिल पोखरेल लगायत कलाकारलाई देख्न सकिन्छ।
आगामी वैशाख १९ गते देशभर प्रदर्शनमा आउने यो फिल्म अहिलेको पुस्तामा बढ्दो डिजिटल निर्भरता र त्यसले पार्ने मनोवैज्ञानिक, सामाजिक तथा पारिवारिक असरलाई उजागर गरी बनेको निर्देशक यादव कुमार भट्टराईले बताए। यसमा मोबाइलको अत्यधिक प्रयोगका कारण सम्बन्धमा आउने दरार, व्यक्तिहरूबीचको दूरी र वास्तविक जीवनभन्दा डिजिटल संसारमै गुम्सिँदै गएका पात्रहरूको कथा देखाइएको उनले जनाए।
निर्देशक भट्टराईले यसअघि फिल्म 'झोला' र 'भोर' निर्देशन गरेका थिए। 'झिल्को' मा आयुषी ढकाल, सुनिल पोखरेल, वर्षा सिवाकोटी, विशाल पोखरेल, भोलाराज सापकोटा, जेनीश श्रेष्ठ, र जेभीश श्रेष्ठको अभिनय रहेको छ। फिल्मको छायांकन दीपक बज्राचार्य, सम्पादन निमेष श्रेष्ठ, कलर तथा साउन्ड मिक्सिङ श्याम कुँवर, र साउन्ड डिजाइन उत्तम न्यौपानेले गरेका छन्।
'झिल्को' को कथा तथा पटकथा निर्देशक भट्टराईले अरुणदेव जोशी र देव व्रतसँग मिलेर तयार पारेका हुन् भने मिडिया फर कल्चर प्रालिको प्रस्तुति र जनता टिभीको निर्माण सहकार्यमा तयार भएको हो।
