अभिनेता राजेश हमालको कमब्याक फिल्म 'नरसिंहाः अवतार' को प्रचारमा नयाँ अभ्यास गरिने भएको छ।
यसको निर्माणपक्षले हालै ६० फिट लामो पोस्टर तयार गरेर सार्वजनिक गरेको छ।
काठमाडौंको ग्लोबल कलेजमा ५ सय विद्यार्थीहरूमाझ पोस्टर सार्वजनिक गरिएको थियो। कलेजको अग्लो भवनबाट फिल्मको पोस्टर सार्वजनिक गरियो। त्यस अवसरमा अभिनेता राजेश हमालले आफ्नो फिल्मी करिअरमा त्यति लामो पोस्टर यसअघि नदेखेको बताए।
फिल्म प्रचारको शैली अब केही परिवर्तन गर्नुपर्छ भन्नेमा आफूहरू रहेको निर्देशक दिवाकर भट्टराई बताउँछन्।
उनले भने, 'हामीकहाँ फिल्मको प्रचार गर्ने तरिका प्रायःको उस्तै देखिन्छ। अब पब्लिसिटीको डिजाइन केही परिवर्तन गर्नुपर्छ। पब्लिक फिगरलाई सिधै पब्लिकसँगै जोड्ने तरिकाले प्रचार गरौं भन्ने हो।'
पोस्टर रिलिज कार्यक्रम पनि त्यही योजनाअनुसार भएको उनले बताए।
त्यसमाथि अभिनेता राजेश हमालको ८ वर्षपछिको कमब्याक फिल्म भएकाले पनि नयाँ तरिकाले प्रचारमा लाग्नुपर्छ भन्नेमा आफूहरू रहेको निर्देशक भट्टराईको भनाइ छ। 'उहाँले विश्वास गरेको फिल्म हो। फिल्म राम्रो बनेको छ। उहाँको कमब्याक भएकाले हाम्रो तर्फबाट प्रचारमा केही विशेष गरौं भन्ने पनि हो,' भट्टराई भन्छन्।
यसपटक फिल्म प्रचारमा गरिएको अभ्यास केही फरकसँगै प्रभावकारी पनि हुने विश्वास रहेको उनले बताए।
'नरसिंहाः अवतार' मा राजेशसहित नीर शाह, राज कटुवाल, नीति शाह, सरोज खनाल, सनिशा भट्टराई, प्रशान्त ताम्राकार, दीपा शाही लगायत कलाकारहरूको अभिनय छ।
निर्मातामा दीपक ढकाल, नरेन्द्र महर्जन, ध्रुव न्यौपाने र नेम महर्जन छन्। 'नरसिंहाः अवतार' जेठ ९ गतेदेखि प्रदर्शनमा आउनेछ।