युवा पुस्तामाझ चर्चित गायक सुशान्त केसीले पहिलोपटक फिल्मको गीत गाएका छ। उनले फिल्म 'कर्मा' को लागि गीत गाएका हुन्।
सोमबार सुशान्त केसीको युट्युब च्यानलमार्फत सार्वजनिक 'पागल' बोलको गीत केही घण्टामै युट्युब ट्रेन्डिङमा समेत पर्न सफल छ। यो गीतमा स्वरसँगै शब्द र संगीत पनि सुशान्तकै छ।
विपीन कार्कीले उपासना सिंह ठकुरीलाई देख्नबित्तिकै मायामा पागल बनेको क्षणलाई गीतले पक्रेको छ। गीतको शब्द तथा लय सुशान्त केसीको आफ्नै फ्लेबरमा छ। जसका कारण युवा पुस्ताले यो गीत मन पराउनेमा फिल्मको निर्माणपक्ष ढुक्क छ। एकले अर्काको आँखामा देखेको प्रेमको गहिराइलाई सुशान्तले गीतमा उतारेका छन्।
नयाँ वर्ष २०८२ को छेको पारेर फिल्म 'कर्मा' आगामी चैत २९ गते रिलिज हुँदैछ। नेपाल र विदेशमा यो फिल्म एकसाथ रिलिज हुँदैछ।
फिल्म ‘कर्मा’ मा विपीन र उपासनासँगै मुकुन भुसाल, दिव्यदेव, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय रहेको छ।
एक्सन जनरामा निर्माण भएको 'कर्मा' ड्रामा, सस्पेन्स र एक्सन जनरामा निर्माण भएको छ। फिल्मको कथा निर्देशक चौधरी आफैँले लेखेका छन्।
‘कर्मा’ ले अन्तर्राष्ट्रिय प्रदर्शन अधिकार बिक्रीको अधिकार सेभेन सिज सिनेमाले लिएको छ। फिल्ममा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ।
तारानाथ न्यौपाने मुख्य सहायक निर्देशक रहेको फिल्ममा समीर मियाको भिएफएक्स, उत्तम न्यौपानेको ब्याकग्राउण्ड स्कोर, शाहिल खानको टिजर-ट्रेलर, विजय बश्यालको पब्लिसिटी डिजाइन र राजेन्द्र मोक्तान कलरिस्ट रहेका छन्।
आर्टिस्टिक इनटरटेनमेन्टको प्रस्तुति रहने 'कर्मा' मा वसन्त लम्सालको लगानी छ।
