जेठ २ गतेदेखि प्रदर्शनमा आउने तयारीमा रहेको फिल्म 'हेल्लो काँशीराम' ले प्रचारप्रसार थालेको छ। केही साताअघि फस्टलुक पोस्टर सार्वजनिक गर्दै प्रचार सुरू गरिएको फिल्मको हालै एक गीतको छायांकन गरिएको छ।
'झ्यामकी मादल झ्याम' बोलको उक्त गीत छायांकनका केही तस्बिर सार्वजनिक भएका छन्, जसमा अभिनेता दिलीप रायमाझीसँग अभिनेत्री प्रियंका कार्कीले नृत्य गरिरहेको देख्न सकिन्छ।
काठमाडौंमा आकर्षक सेट बनाएर खिचिएको उक्त गीतमा ६४ जना कोरस डान्सर रहेको जनाइएको छ। यो भिडिओको कोरियोग्राफी कविराज गहतराजले गरेका हुन्। प्रताप दास र मेलिना राईको स्वर रहेको गीतलाई निर्माण टिमले नयाँ वर्षलाई लक्षित गर्दै सार्वजनिक गर्ने तयारी गरिरहेको छ।
कमेडी जनरामा निर्माण गरिएको ‘हेल्लो काँशीराम’ मा अभिनेता दिलीप रायमाझीको मुख्य भूमिका छ।
रिम विश्वकर्माको लेखन तथा निर्देशनमा तयार भएको फिल्ममा दिलीपसहित सुरवीर पण्डित, रामचन्द्र अधिकारी, सुशील पोखरेल, उमेश राई, अर्जुन गुरूङ, नवज्योती रसाइली, सुमन खाँण, अजय न्यौपाने, सरोज केसी, उमेश मायालु लगायत कलाकारहरूको अभिनय छ। प्रियंका कार्की भने विशेष भूमिकामा देखिन लागेकी हुन्।
रेडलाइन फिल्म्सको ब्यानरमा निर्माण भएको फिल्मका निर्माता पी.बी. थापा हुन्।
