फिल्म 'महाभोज' मा अभिनेता तथा निर्देशक निश्चल बस्नेतले स्वर दिएको गीत समावेश हुने भएको छ।
आगामी जेठ १५ गतेदेखि प्रदर्शनमा आउने यो फिल्मका लागि निश्चलले हालै काठमाडौंको एक स्टुडिओमा गीत रेकर्ड गराएका हुन्।
'लालुमै' शीर्षकको उक्त गीतमा हर्क साउदको शब्द तथा केतन क्षेत्रीको संगीत छ।
फिल्म 'महाभोज' निर्देशक दिनेश राउतले निर्देशन गरेका हुन्। रोचक कुरा के छ भने, निश्चल बस्नेतलाई 'काले दाइ' भनेर चिनाउने अवसर पनि निर्देशक राउतकै २०७४ सालमा रिलिज भएको चलचित्र 'पर्व' को लोकप्रिय गीत 'काले दाइ' बाट मिलेको थियो।
उक्त गीतमा बस्नेतले स्वर दिएका थिए भने अभिनेत्री माला लिम्बुसँग नृत्य समेत गरेका थिए। हालसम्म यो गीत युट्युबमा ६ करोड ३० लाख पटक हेरिएको छ ।
निर्देशक दिनेश राउतका अनुसार 'लालुमै' गीतको लागि निश्चल बस्नेत नै उपयुक्त आवाज भएका कारण उनलाई नै रोजिएको हो। राउतले भने, '८ वर्षअघि पर्वको गीतका लागि निश्चललाई गाउन लगाउँदा एक अलग अनुभूति आएको थियो। अहिले लालुमैमा पनि फरक भोकल टोन आवश्यक परेकोले निश्चललाई नै लिएको हुँ।'
फिल्म 'महाभोज' मा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरूङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाह लगायत कलाकारहरूको अभिनय छ।
क्लक वर्क क्रियशन र पिक्चर फ्रेमको संयुक्त निर्माणमा तयार भएको फिल्मका निर्माता हिमाल कडरिया हुन्। चलचित्रको स्क्रिप्ट विकास सुवेदीले लेखेका हुन्। छायाँकार राजेश श्रेष्ठ हुन् भने सम्पादन निमेष श्रेष्ठको छ।
'महाभोज' नेपालमा काफिया फिल्म्स् र कुबेर सिने डिस्ट्रिब्युसनले वितरण गर्नेछन्।
