फागुन २९ गतेदेखि प्रदर्शनमा आएको फिल्म 'अञ्जिला' ले राम्रो कमाइ गरिरहेको निर्माणपक्षले जनाएको छ।
यसका निर्माताले आइतबार फिल्मको तीन दिनको ग्रस कलेक्सन रिपोर्ट सार्वजनिक गरेका छन्। जसअनुसार फिल्मले बिहीबार, शुक्रबार र शनिबार गरेर २ करोड ७ लाख रूपैयाँ ग्रस कलेक्सन गरेको छ।
निर्माता प्रेमकुमार श्रेष्ठले वितरकहरूबाट प्राप्त रिपोर्टका आधारमा कमाइबारे जानकारी दिइएको बताए।
रिलिजको पहिलो दिनदेखि नै दर्शकको साथ पाएको फिल्मले शनिबार देशभरका हलमा राम्रो व्यापार गरेको थियो। फिल्ममा दर्शकको उपस्थिति उत्साहजनक भएसँगै कतिपय हलले शो समेत थपेका थिए।
वितरक करण श्रेष्ठले 'अञ्जिला' ले आइतबार पनि राम्रो व्यापार गरेको बताए।
'अञ्जिला' नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनीमा आधारित छ।
फिल्ममा एन्जिला आफैले प्रमुख भूमिकामा अभिनय गरेकी छन्। उनको बाल्यकालदेखि खेल जीवनसम्मको संघर्ष र सफलताको भावुक कथा यसमा प्रस्तुत गरिएको छ। एन्जिलाको साथमा फिल्ममा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय छ।
यो फिल्म मिलन चाम्सले निर्देशन गरेका हुन्।
