फिल्म 'होस्टेल-३' ले राम्रो कमाइ गरिरहेको छ।
गत शुक्रबारदेखि प्रदर्शनमा आएको फिल्मले एक सातामा ४ करोड रूपैयाँभन्दा माथिको ग्रस कलेक्सन गरेको निर्माणपक्षले दाबी गरेको छ।
फिल्मले बिहीबारसम्ममा ४ करोड ३२ लाख रूपैयाँ ग्रस कलेक्सन गरेको विवरण यसको निर्माणपक्षले सार्वजनिक गरेको छ।
फिल्म निर्माण कम्पनी सम्मान इन्टरटेन्मेन्टका सञ्चालक समेत रहेका 'होस्टेल-३' का निर्देशक सशान कँडेलले वितरकहरूबाट प्राप्त रिपोर्टको आधारमा व्यापारिक आँकडा सार्वजनिक गरिएको बताए।
'हामीलाई वितरकले दिएको रिपोर्ट नै आधिकारिक हुन्छ। वितरकले दिएको बिहीबारसम्मको रिपोर्टमा ४ करोड ३२ लाख ग्रस कलेक्सन देखिएको छ,' कँडेलले भने। उनका अनुसार फिल्मले काठमाडौं उपत्यकामा २ करोड ३० लाख र उपत्यका बाहिर २ करोड २ लाख कलेक्सन गरेको हो।
फिल्मलाई काठमाडौंमा गोविन्द शाही नेतृत्वको काफिया फिल्म्स र उपत्यका बाहिर रोहित कट्टेल र रत्न श्रेष्ठ नेतृत्वको आरआर फिल्म्सले वितरण गरेका हुन्।
यो फिल्ममा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतको मुख्य भूमिका रहेको छ। आशिष पुरूष, रोहन श्रेष्ठ, उमर खान र सन्तोष बानियाँ पनि फिल्ममा रहेका छन्। प्रवीण खतिवडाले वार्डेनको भूमिका निभाएका छन्।
माधव शर्माको पटकथा तथा संवाद लेखन रहेको फिल्मको निर्माता सुरेश कँडेल, कर्ण कार्की र गोविन्द अधिकारी हुन् भने सह–निर्मातामा शिशिर ज्ञवाली, अनिश सिग्देल, कुन्दन गुप्ता र गणेश मगर छन्।
'होस्टेल-३' शुक्रबारदेखि प्रदर्शनको दोस्रो सातामा प्रवेश गरेको छ।
