'१२ गाउँ–२' बनाउन लागेको चर्चा चलिरहँदा अभिनेता तथा निर्देशक विराज भट्टले अर्को फिल्म साइन गरे।
म्युजिक भिडिओ निर्देशक माइकल चन्दले निर्देशन गर्न लागेको फिल्म 'राम नाम सत्य' मा विराज अनुबन्धित भएका हुन्।
निर्देशक चन्दका अनुसार यसमा एक्सन, थ्रिल, लभस्टोरी, रोमान्टिक, सेन्टिमेन्ट सबै समेटिने छ।
उनले भने, 'विराज दाईलाई चाहिँ पूर्ण एक्सनमा देखाउनेछौं। एक्सनमा पनि एकदमै फरक गर्ने तयारी गरेका छौं।'
फिल्म '१२ गाउँ' रिलिज भएपछि विराजको चर्चा फेरि चुलिएको छ। उनलाई थुप्रै फिल्मबाट अफर पुगिरहेको छ।
निर्देशक माइकल चन्द भन्छन्, 'उहाँले १२ गाउँ रिलिजपछि १५/२० वटा फिल्मको स्क्रिप्ट सुन्नुभएको होला। हाम्रो वानलाइन स्टोरी अलि पहिले सुनाउँदा मन पराउनुभएको थियो। पछि पुरै स्क्रिप्ट सुन्ने तरिकाले बस्यौं। त्यतिबेला एकदमै मन पराउनुभएपछि यसमा काम गरौं भन्नुभयो।'
'१२ गाउँ २' को स्किप्ट तयार समेत भैसकेको थियो। तर, विराजले त्यसलाई पछि सारेर 'राम नाम सत्य' मा काम गर्न लागेका हुन्। केही फरक र विशेष गर्ने योजना रहेका कारण प्रि–प्रोडक्सनमा पनि समय लगाएको निर्देशक चन्दको भनाइ छ। यो निर्देशक चन्दको डेब्यु फिल्म हुनेछ।
उनका अनुसार आगामी हप्तासम्म कलाकारको लाइनअप तयार हुने छ।
बाँकी कलाकार पनि चलेका र एक/दुई जना नयाँ कलाकार पनि हुनसक्ने उनले बताए। वर्कसप गरेर वैशाख दोस्रो हप्तादेखि छायांकन सुरू गर्ने तयारी रहेको निर्देशक माइकल चन्दले जनाए।
फिल्ममा उत्तम गुरूङ, उपेन्द्र शाही र स्वेता विमलीको लगानी रहनेछ। नरेन्द्र शाह र सन्तोष अर्याल फिल्मको सह–निर्माता रहनेछन्।
