दीपक रौनियार निर्देशित फिल्म 'राजागंज' को बुधबार काठमाडौंमा प्रिमियर गरिएको छ।
प्रिमियरमा फिल्मकर्मीदेखि नेताहरूले फिल्म हेरेका थिए। फिल्म हेरेपछि पूर्वप्रधानमन्त्री तथा नेपाल समाजवादी पार्टी (नयाँ शक्ति) का अध्यक्ष बाबुराम भट्टराईले फेसबुकमा स्टाटस लेख्दै फिल्मको तारिफ गरेका छन्।
'नेपाली फिल्मलाई अन्तर्राष्ट्रिय जगतमा स्थापित गर्न महत्वपूर्ण भूमिका निर्वाह गर्ने दीपक रौनियार निर्देशित पछिल्लो फिल्म ‘राजागंज’ (चैत्र १ गतेबाट हलहरूमा प्रदर्शन हुने!) हेर्दा निकै विचारोत्तेजक र आनन्ददायी लाग्यो। पछिल्लो मधेश आन्दोलनको पृष्ठभूमि र क्राइम थ्रिलर विधामा बनेको यो फिल्मले देशको अन्तर्जातीय सम्बन्ध, लैंगिक-सामाजिक विभेद, शैक्षिक र राजनीतिक क्षेत्रका विसंगति संगसंगै अपराध र अपराध अनुसन्धानका विधिवारे रोचक र मार्मिक चित्रण गरेको छ' उनले लेखेका छन्, 'आशा मगराती, निकिता चान्दक, दयाहाङ राई, ऋचा शर्मा, विजय बराल, गौमाया गुरूङ, पशुपति राई, निरज शर्मा, परमेश्वर कुमार झालगायत कलाकारले जीवन्त अभिनय गरेका छन्। कथानक, संवाद, छायांकन, संगीत, सम्पादन लगायतका प्राविधिक पक्ष सन्तोषजनक छन्। परन्तु यस्ता यथार्थवादी फिल्महरूलाई प्रश्रय दिनुपर्नेमा राज्यले प्र.म. सम्बन्धी प्रसंगको वहानामा फिल्मको मर्ममाथि नै प्रहार हुनेगरी सेन्सरको कैंची चलाउनु निन्दनीय छ।'
