शुक्रबारदेखि प्रदर्शनमा आएको फिल्म 'होस्टेल-३' ले उत्साहजनक व्यापार गरेको छ।
पहिलो दिनबाटै फिल्मले राम्रो व्यापार गरिरहेको वितरक र निर्देशकले बताएका छन्। खासगरी शनिबार बिहानैदेखिका शोमा अकुपेन्सी उच्च रह्यो। उक्त दिन धेरै शो हाउसफुल रहे।
फिल्मको काठमाडौं उपत्यका वितरक काफिया फिल्मका गोविन्द शाहीले बिदा बाहेकको दिनमा पनि 'होस्टेल-३' ले राम्रो व्यापार गरिरहेको बताए।
'माहोल एकदमै राम्रो छ। आज पनि फिल्मले राम्रो गरिरहेको छ,' उनले भने, 'बिहानको शोमा पनि अकुपेन्सी ४० प्रतिशतभन्दा माथि थियो। २ बजेपछिका शोमा ८० प्रतिशतसम्म छ। यसलाई उत्साहजनक मान्नुपर्छ।'
वितरक शाहीले भने, 'ब्राण्ड नाम त छँदैथियो। नयाँ कलाकारहरूलाई पनि दर्शकले एसेप्ट गरे। उनीहरूले काम पनि राम्रो गरेका छन्। सामाजिक सञ्जालमा उनीहरूले जुन चर्चा परिचर्चा कमाएका थिए त्यसले पनि फाइदा गर्यो। सबै कुरा मिल्यो जस्तो लाग्छ।'
उनले ग्रस कलेक्सनको एकमुष्ट विवरण भने आउन बाँकी रहेको बताए।
काठमाडौं बाहिर वितरण गरेको आरआर फिल्मस्का रोहित कट्टेलले पनि फिल्मले सोचेभन्दा राम्रो व्यापार गरिरहेको बताए। उनले भने, 'धेरै समयपछि राम्रो चहलपहल देखिएको छ। मोफसलमा बुकिङभन्दा अझ डोरसेल राम्रो भइरहेको छ।'
यस्तै, निर्देशक सशान कँडेलले फिल्मलाई दर्शकले रूचाएको भन्दै खुसी व्यक्त गरे। यसको कथा, प्रस्तुति, कलाकारको काम सबैलाई लिएर दर्शकबाट राम्रो प्रतिक्रिया पाएको उनले बताए। 'निर्देशनका हिसाबले पहिलो फिल्ममै सोचेको भन्दा धेरै माया पाउँदा एकदमै खुसी छु,' उनले भने।
उनका अनुसार फिल्मको दुई दिनको ग्रस कलेक्सन १ करोड ७० लाखभन्दा माथि थियो। आइतबारको विवरण आइसकेको छैन। निर्देशक कँडेलले फिल्मले लगानी सुरक्षित गरिसकेको दाबी गरे।
उनले भने, 'विदेश राइटस्, डिजिटल राइटस्, हिजोसम्मको बक्सअफिस कलेक्सनको हिसाब गर्दा लगानी सुरक्षित भइसक्यो। आजदेखिको व्यापार फाइदा हो।'
होस्टेलमा बसेर अध्ययन गरिरहेका टिनएजरहरूको कथामा 'होस्टेल ३' बनेको हो। यसमा कुल ब्वाइ भनेर चिनिने पारस बम ठकुरी, सिम्रन पन्त, आशिष घिमिरे, पदम तामाङ, रिहान गिरी, समा पराजुली, हेना नगरकोटी लगायतको अभिनय छ।
