दीपक रौनियार निर्देशित फिल्म 'राजागंज' जनकपुरमा भव्य प्रिमियर गरिएको छ।
फिल्मको छायांकनस्थल जनकपुरमा अवस्थित ६ सय दर्शक क्षमताको गिरिजा हलमा फिल्मको रेड कार्पेट प्रिमियर गरिएको हो।
जनकपुरधाम उपमहानगरपालिकाका मेयर मनोज कुमार शाह, एसपी भूवनेश्वर तिवारी, चलचित्र विकास बोर्ड मधेश प्रदेशका कार्यवाहक अध्यक्ष अशोक दत्त, मानव अधिकारकर्मी र अभियन्ता समेतले प्रिमियरमा फिल्म हेरे।
प्रिमियरमा फिल्मको टिमबाट निर्देशक दीपक रौनियार, अभिनेत्री आशा मगराती, आरती मण्डल, सुरज यादव, रिंकु गायत्री मिश्रा, परमेश्वर झा, मदन ठाकुर, सरोज मिश्र, घनश्याम मिश्रलगायत उपस्थित थिए।
फिल्म हेरिसकेपछि अधिकांश पाहुनाले प्रमुख पात्र ‘पूजा सर’ को तारिफ गरे। महिलाहरु पूजा, सर जसरी नै आँटिलो, जोशिलो र हिम्मतिलो हुनुपर्ने सन्देश फिल्मले दिएको बताए।
यो फिल्ममा आशासहित दयाहाङ राई, विजय बराल, ऋचा शर्मा, पशुपति राई, पूर्वमिस नेपाल निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठ लगायतको अभिनय छ।
'राजागंज' चैत १ गतेदेखि प्रदर्शनमा आउँदैछ।
'इन्द्रेणी' गीत सार्वजनिक
यसैबीच फिल्ममा समावेश गीत ‘इन्द्रेणी’ सार्वजनिक भएको छ। गीतमा प्रवेश मल्लिकको संगीत तथा धिरेन्द्र प्रेमर्शीको शब्द रचना र स्मारिका फुयाँलको स्वर छ।
मधेशको सेटअपमा खिचिएको गीतलाई फिल्मको कथा वाचन गर्ने गीतको रुपमा समावेश गरिएको छ। गीतको सार्वजनिक भिडिओमा फिल्मका प्रायः सबैजसो कलाकारलाई स्थान दिइएको छ।
गीतका शब्दले मधेश र पहाडमा हुने विभेदलाई प्रस्तुत गरेको भान हुन्छ।
