फिल्म 'होस्टेल-३' शुक्रबारदेखि प्रदर्शनमा आएको छ।
यो फिल्ममा मुख्य भूमिकामा सबैजसो नयाँ कलाकारहरू छन्। दर्शकले यो फिल्ममा एकजना चर्चित कलाकारलाई भने 'सरप्राइज' का रूपमा हेर्न पाएका छन्।
अभिनेता केदार घिमिरे (माग्ने बुढा) ले पनि यो फिल्ममा अभिनय गरेका छन्। अन्य कलाकारबारे निर्माण टिमले जानकारी दिए पनि केदारको अभिनय रहेकोबारे भने फिल्म रिलिजसम्म लुकाउन सफल भएको थियो।
फिल्ममा केदार छोटो भूमिकामा छन्। हलमा फिल्म हेर्न जाने दर्शकले उनलाई हेर्न पाउनेछन्।
'होस्टेल–३' मा पारस बम ठकुरी (कुल ब्वाइ), सिम्रन पन्त, पदम तामाङ, आशिष घिमिरे, रिहान गिरी, समा पराजुली, हेना नगरकोटी लगायतको शीर्ष अभिनय छ।
आशिष घिमिरे केदारका छोरा हुन्। उनले 'होस्टेल–३' बाट फिल्ममा डेब्यू गरेका हुन्। चर्चित टिकटकर कुल ब्वाइ र सिम्रन पन्तको पनि यो डेब्यू फिल्म हो। गायन रियालिटी शोबाट चम्किएका रिहान गिरी, युट्युब लगायत सोसल मिडियामा चर्चित पदम तामाङले पनि यसबाटै फिल्ममा डेब्यू गरेका हुन्।
'होस्टेल-३' ले शनिबार देशभरका हलमा राम्रो व्यापार गरिरहेको छ। कलाकारहरू पनि दर्शकसँग खुसी साट्न हल–हलमा पुगिरहेका छन्।
