चैत १ गतेदेखि प्रदर्शनको तयारीमा रहेको फिल्म 'राजागंज' की मुख्य अभिनेत्री आशा मगराती स्वीट्जरल्याण्डको प्रतिष्ठित फ्रिबर्ग अन्तर्राष्ट्रिय सिनेमा महोत्सवको अन्तर्राष्ट्रिय जुरी सदस्यमा मनोनित भएकी छन्।
अन्तर्राष्ट्रिय महिला दिवसको अवसरमा शनिबार यो खबर आयोजक संस्थाले सार्वजनिक गरेको हो। फ्रिबर्ग अन्तर्राष्ट्रिय सिनेमा महोत्सवले आफ्नो वेब–साइटमार्फत अभिनेत्री मगरातीलाई जुरी सदस्यमा मनोनित गरेकोबारे जानकारी दिएको छ।
यो महोत्सवमा सन् २०१७ मा उनको अभिनय रहेको 'सेतो सूर्य' ले ४ अवार्ड जितेको थियो। यो महोत्सवको ३९ औं संस्करणको कथानक प्रतिस्पर्धातर्फ नेपालबाट अभिनेत्री मगरातीसहित बेलायती छायांकार डेरेक हडसन र स्वीस अभिनेत्री तथा पियानोवादक अन्ना पिएरी जुरचर पनि जुरी सदस्यमा मनोनित भएका छन्।
फ्रिबर्ग महोत्सवमा अभिनेत्री आशा मगरातीको शीर्ष भूमिका रहेको 'राजागंज' पनि प्रिमियर हुँदैछ। यो फिल्म दीपक रौनियारले निर्देशन गरेका हुन्।
यस वर्षको फिबर्ग अन्तर्राष्ट्रिय सिनेमा महोत्सव मार्चको २१ देखि ३० सम्म स्वीटजरल्याण्डमा आयोजना हुँदैछ। चैत १ गते नेपालमा ‘राजागंज’ रिलिजपछि आशा महोत्सवका लागि स्वीट्जल्याण्ड उड्ने छिन्।
यो फिल्ममा आशासहित दयाहाङ राई, विजय बराल, ऋचा शर्मा, पशुपति राई, पूर्वमिस नेपाल निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठ लगायतको अभिनय छ। भेनिस, ह्याम्बर्ग, बुसान र मुम्बई जस्ता विश्वका ठूला फेस्टिभलमा यो फिल्मले आफ्नो प्रभाव जमाइसकेको छ।
फिल्मले भेनिसमा १० मिनेटको स्ट्यान्डिङ ओभेसन प्राप्त गरेको थियो। 'राजागंज' नेपालमा आउँदो शुक्रबार रिलिज तयारीमा छ।
