आफूलाई पर्फमर बताउने दुर्गेश थापालाई पछिल्ला महिना मेला–महोत्सवमा प्रस्तुति दिन भ्याइनभ्याइ छ।
एकातिर उनको पछिल्लो गीत 'दुश्मन हेरेको हेर्यै' को युट्युब भ्युजको रफ्तार घट्ने छाँटकाँट देखिँदैन। यो गीतमाथि टिकटकमा पनि लाखौं भिडिओ बनेका छन्।
अर्कोतर्फ दुर्गेश दिनहुँ महोत्सवमा पुगेर दर्शक झुमाइरहेका छन्। दुबईको कार्यक्रम सकेर यही फागुन ६ गते काठमाडौं फर्किएका उनले बिहीबार (आज) सम्म १६ वटा स्टेज कार्यक्रम गरेको बताए।
सेतोपाटीसँग कुरा गर्दै उनले भने, 'हिजो उर्लाबारीमा थिएँ। आज काठमाडौं चुनीखेलमा प्रस्तुति दिँदैछु। फागुनमै दुईचोटि त एकै दिन दुइटा कार्यक्रम गरेँ।'
उसो त उनी विगतका वर्षमा पनि महोत्सवमा खोजिने कलाकारमध्येमा पर्थे। यो वर्ष आफ्नो व्यस्तता दोब्बर बढेको उनले बताए। उनी पुगेका महोत्सवमा दर्शकको उपस्थिति पनि थामिनसक्नु हुने गरेको छ। सामाजिक सञ्जालमा पनि दुर्गेशको स्टेज प्रस्तुतिका भिडिओ क्लिपहरू बेलाबेलामा भाइरल भइरहेका हुन्छन्।
आज हामीले उनै दुर्गेशसँग स्टेज विशेष कुराकानी गरेको छौं। प्रस्तुत छ उनीसँगको कुराकानीको सम्पादित अंशः–
१. स्टेज कार्यक्रममा भ्याइनभ्याइ छ है?
एकदमै राम्रो भइरहेको छ।
२. पछिल्लो महिना कति वटा कार्यक्रम गर्नुभयो?
दुबईबाट ६ गते फर्किएपछि ७ गतेदेखि आजसम्म दैनिक महोत्सवमै व्यस्त छु। यो बीचमा हेटौंडा र नुवाकोटमा एकैदिन प्रस्तुति दिए। जुधेका कारण यी ठाउँमा जान हेलिकप्टर प्रयोग गरेको थिएँ। अब एक/दुई दिन आराम गरेर फेरि महोत्सवको मिति तय छ।
३. एकै दिन दुइटा स्टेज कार्यक्रम गर्दा गाह्रो हुँदैन?
प्रस्तुति दिन त गाह्रो हुँदैन। समय व्यवस्थापन गर्न मात्र गाह्रो हो।
४. महोत्सवमा हेलिकप्टर नै लिएर जाने अवस्था कसरी आयो?
हेटौंडा र नुवाकोटको सन्दर्भमा मैलै झुक्किएर एकै दिनलाई मिति दिएछु। बचन दिएपछि पूरा गर्नुपर्छ भन्ने हो। त्यसमाथि कलाकारका लागि पैसाभन्दा पनि दर्शक/स्रोता ठूलो कुरा हो। झुक्किएर एकै दिनको मिति दिएका कारण हेलिकप्टर नै प्रयोग गरेको हुँ।
अर्घाखाँची र स्याङ्जाको सन्दर्भमा दुवै ठाउँमा महोत्सवको अन्तिम दिन थियो। स्याङ्जाबाट पहिल्यै आमन्त्रण भए पनि अर्घाखाँचीबाट अन्तिम समयमा आमन्त्रण गर्नुभयो। दर्शकको माग भयो, आउनुपर्यो, हामी तपाईंलाई जति पनि पारिश्रमिक दिन सक्छौं भन्नुभएको थियो।
मैले पैसा भन्दा पनि समय कसरी व्यवस्थापन गर्न सकिन्छ भन्ने हो, हेलिकप्टरले कति लिन्छ, हजुरले सक्नुहुन्छ भने हेलिकप्टर प्रयोग गरेर कार्यक्रम गर्न सकिन्छ भनेँ। त्यसमा उहाँहरू सहमत भएपछि हेलिकप्टरमा गएको हुँ।
५. हेलिकप्टरको खर्च कसले बेहोर्यो त?
आयोजकलाई मर्का परेको छ भने म आफै पनि मिलाएर गरिरहेको हुन्छु। हेलिकप्टर प्रयोग गर्नुपर्ने भयो भने सकेसम्म मैले पारिश्रमिक लिएर हेलीलाई दिएर आफूलाई केही बच्ने गरी कार्यक्रम गर्छु।
६. स्टेज कार्यक्रममा पारिश्रमिक चाहिँ कति लिनुहुन्छ?
पारिश्रमिक ठ्याक्कै यति भनेर खुलाउन उचित हुँदैन। म आयोजक र कस्तो खालको कार्यक्रम हो, त्यो हेरेर पारिश्रमिक निर्धारण गर्छु।
सामाजिक सहयोगका लागि गरेको कार्यक्रम छ भने, पारिश्रमिक नलिइ पनि गरिरहेको हुन्छु। स्कुलका कार्यक्रममा न्यूनतम पारिश्रमिकमा पनि गइरहेको हुन्छु। पैसाकै लागि आयोजना गरिएको कार्यक्रममा चाहिँ बढी नै लिन्छु।
७. तपाईं पुग्ने महोत्सवमा थामिनसक्नु दर्शक उर्लिन्छन् किन होला?
मेरो प्रस्तुतिमा दर्शक निराश हुँदैनन्। एकदेखि डेढ घन्टासम्म उहाँहरू मज्जाले रमाउँछन्। कोही दर्शकलाई बोर हुन नदिने तरिकाले प्रस्तुतिको तयारी गरेको हुन्छु। दर्शक/स्रोता मेरो प्रस्तुतिमा कनेक्ट हुन्छन्, म दर्शकसँग कनेक्ट हुन्छु। दर्शकसँगै नाच्छु, रमाइलो गर्छु। मैले कोही दर्शकलाई निराश बनाएर नपठाउने भएकाले पनि म आउँदैछु भनेपछि दर्शक धेरै आएका होलान्। त्यसमाथि मेरा गीत, मप्रतिको मायाका कारण लाइभ प्रस्तुति हेर्न खोजेर आउँछन् होला।
८. यो वर्ष तपाईंको व्यस्तता 'दुश्मन हेरेको हेर्यै' गीत चलेपछि बढेको हो?
हो। यो गीतले धेरैलाई हेरेको हेर्यै नै बनाइदियो। साथी-सर्कलको साथ, मलाई माया गर्ने दर्शक/स्रोताहरूका कारण नै यो सम्भव भएको हो। (हाँस्दै) यो गीत सुनेर दुश्मन पनि मेरो फ्यान भएजस्तो लाग्छ।
९. स्टेजमा गएर पहिले कुन गीत प्रस्तुत गर्नुहुन्छ?
अहिले त दुश्मन हेरेको हेर्यैबाटै सुरू गर्छु। यद्यपि, वान्स मोरका कारण यो गीत धेरैपटक गाउनुपर्छ। त्यसपछि बमबम बोले, रातोरातो खुर्सानी, बिच्चबिच्चमा लगायत थुप्रै गीतमा प्रस्तुति दिन्छु। एकै दिन दुइटा कार्यक्रम भए पनि डेढ घन्टाभन्दा बढी नै प्रस्तुति दिएको हुन्छु।
१०. तपाईं महोत्सवमा पुग्दा फरक फरक खालका फ्यानहरू भेटिएका भिडिओहरू सामाजिक सञ्जालमा भेटिन्छन्। तपाईंले सम्झिरहने फ्यानबारे बताइदिनुहोस् न!
बच्चादेखि युवा, वृद्धसम्मका फ्यान भेट्छु। त्यसले एकदमै हौसला समेत दिन्छ। तर नाम चाहिँ त्यति याद हुँदैछ। कति फ्यानलाई म आफूले लगाएको ज्याकेट खोलेर समेत दिइरहेको हुन्छु। टिसर्ट खोलेर दिएको हुन्छु। कुनै फ्यानहरूले ब्रासलेट ल्याइदिनुहुन्छ, अहिले पनि लगाइरहेको छु। कोही फरक क्षमता भएका फ्यान भेटाएँ भने उहाँहरूलाई जति सक्दो सहयोग गर्छु।
अस्ति इलाममा एक जना भाइ ह्विलचियरमै आउनुभएको थियो। हामीले कमाउने भनेको दर्शक/स्रोता हो भन्ने लाग्छ। पैसाको मात्रै पछि लाग्ने भए सायद अझै कति कमाउन सक्थेँ होला। तर म पैसा भन्दा नाम र एउटा आफ्नो ब्रान्ड बनाऔं भनेर हिँडिरहेको छु।
११. दुश्मन हेरेको हेर्यै दुई महिनामै युट्युबमा ३ करोडभन्दा बढी पटक हेरिसकिएको छ। कस्तो लागिरहेको छ?
एकदमै खुसी लागिरहेको छ। दिनमै १० देखि १२ लाखले हेर्नुभएको छ।
१२. यो गीत यति धेरै चल्नुको कारण के हो जस्तो लाग्छ?
धेरैको जीवनमा मेल खाएको भएरै होला। सामान्य एउटा व्यापारीको पनि कोही न कोही दुश्मन हुन्छ भन्ने लाग्छ। कुनै व्यापारीले तरकारी बेच्न राखेको छ, त्यसको छेउमा अर्कोले तरकारी ल्याएर बिक्रीका लागि राख्यो भने त्यहाँ दुश्मनी सुरू हुन्छ। सामान्य व्यक्तिदेखि ठूलाठूला व्यक्तिसम्ममा गीत मेल खाने भएरै चल्यो भन्ने लाग्छ।
१३. अब कस्ता गीत ल्याउनुहुन्छ?
अहिले स्टेजतिर व्यस्त भएर आगामी गीतमा धेरै समय दिन सकेको छैन। यद्यपि छिट्टै नयाँ गीतहरू ल्याउनेछु। त्यसको एक किसिमको तयारी भइसकेको छ। आगामी गीतहरू पनि स्रोता/दर्शकलाई मनपर्ने, उहाँहरू नाच्ने खालका गीतहरू आउँछन्।
सबै तस्बिर सौजन्यः दुर्गेश थापा
