गत बुधबार रिलिज भएको फिल्म 'फेरि रेशम फिलिली' ले दर्शकबाट राम्रो प्रतिक्रिया पाइरहेको छ।
फिल्म हेरेका दर्शकले यसलाई पैसा असुल फिल्म भएको बताएका छन्।
दर्शकबाट मिलेको सकारात्मक वर्ड अफ माउथको प्रभाव विस्तारै बक्सअफिसमा समेत देखिन थालेको निर्माता रौनक विक्रम कँडेल बताउँछन्।
फिल्मले बिदाका दिनमा राम्रो व्यापार गरेको उनले बताए।
फिल्मकी मुख्य अभिनेत्री सुपुष्पा भट्टले शनिबार काठमाडौं उपत्यकाका विभिन्न हलमा दर्शकसँग साक्षात्कार गरेपछि मिडियासँगको कुराकानीमा शुक्रबार दिउँसोदेखि रातीसम्मका प्रायः शो हाउसफुल भएको बताइन्।
सकारात्मक वर्ड अफ माउथको प्रभाव शनिबार हलमा देखिएको वितरक गोविन्द शाहीले बताए। शनिबार बिहानी शोबाट नै हलमा दर्शकको उपस्थिति राम्रो देखिएको उनको भनाइ छ। सिनेमाका निर्देशक निरोज महर्जन पनि शुक्रबारबाट हलमा दर्शकको चाप देखिन थालेपछि आफ्नो काम सफल भएको महसुस हुन थालेको बताउँछन्।
'कहिले घाँममा कहिले छायाँमा' सार्वजनिक
यसैबीच फिल्ममा समावेश गीत 'कहिले घाँममा कहिले छायाँमा' सार्वजनिक भएको छ। फिल्म रिलिजको ४ दिनपछि सार्वजनिक यो गीतमा कल्याण सिंहको संगीत र हर्क साउदको शब्द रचना तथा सुगम पोखरेलको स्वर छ।
सार्वजनिक गीतको भिडिओमा मुख्य कलाकारहरू विनय श्रेष्ठ, सुपुष्पा भट्ट, कामेश्वर चौरासिया, महेश त्रिपाठी र प्रकाश दाहाल फिचर्ड छन्।
