'काठमाडौं उत्सव' शुक्रबार आठ जना स्थापित कविहरूका कविता वाचनबाट सुरू भएको छ।
नेपाल पर्यटन बोर्डमा आयोजित दुई दिने उत्सवको उद्घाटन सत्रमा नेपाल प्रज्ञा प्रतिष्ठानका कुलपति भूपाल राई, वैरागी काइँला, सुलोचना मानन्धर, विप्लव प्रतीक, उषा शेरचन, तुलसी दिवस, होमनाथ सुवेदी र दिनेश अधिकारीले आफ्ना कविता सुनाएसँगै कार्यक्रमको औपचारिक उद्घाटन भएको हो।
उद्घाटन सत्रमा आफ्नो छोटो मन्तव्य राख्ने क्रममा काठमाडौं उत्सवका सल्लाहकार ओम रिजालले भने, 'यो महोत्सव कला संस्कृतिका धरोहरहरुसँगै भुइँमान्छेहरूका आवाजसमेत समेट्ने उत्सव हो।'
आयोजक समूह नै युवा भएको महोत्सवमा धेरैभन्दा धेरै युवा पुस्ताको काम, उपस्थिति र सोचलाई प्राथमिकता राखिएको उत्सवका संयोजक बाबु त्रिपाठीले बताए।
उत्सवमा जम्मा १५ सत्र हुनेछन्।
संवाद र कविता गजल प्रस्तुतिबाहेक 'काठमाडौं उत्सव' मा काठमाडौंको सभ्यता झल्काउने रैथाने खाना, चित्रकला प्रदर्शनी र बुक स्टलसमेत राखिएका छन्।
