केदार घिमिरे (माग्ने बुढा)को शीर्ष अभिनय रहने फिल्म 'माग्ने राजा' को छायांकन सुरू गरिएको छ। बुधबार महाशिवरात्रिको अवसर पारेर सूर्यविनायक मन्दिरमा स्क्रिप्ट पूजा गर्दै फिल्मको छायांकन सुरू गरिएको हो।
फिल्मको छायांकन काभ्रेको बल्थलीबाट सुरू गरिएको छ।
ऋषि लामिछानेको निर्देशन रहने यो फिल्ममा केदार घिमिरे (माग्ने बुढा)सहित, आर्यन सिग्देल, वर्षा शिवाकोटी, विल्सनविक्रम राई, शिशिर वाङ्देल लगायतको मुख्य भूमिका रहनेछ। दर्शकले माग्ने बुढा र तक्मे बुढाको जोडीलाई वर्षौपछि यसै फिल्ममार्फत पर्दामा हेर्न पाउनेछन्।
एउटा गरिबको धनी बन्ने महत्वाकांक्षाको कथामा 'माग्ने राजा' निर्माण हुन लागेको फिल्मका लेखक सामिप्यराज तिमिल्सेनाले जानकारी दिए।
आरम्भ प्रोडक्सनको ब्यानरमा निर्माण हुने फिल्मको निर्माता मुनाल घिमिरे हुन्। यो फिल्म नरेन्द्र मैनालीले खिच्नेछन्।
आगामी हरितालिका तीजमा फिल्म प्रदर्शनमा आउने घोषणा भइसकेको छ।
