यस वर्षको ब्लकबस्टर फिल्म 'पूर्ण बहादुरको सारंगी' फेम्ड निर्देशक सरोज पौडेलले नयाँ फिल्मको शुभमुहूर्त गरेका छन्।
बुधबार महाशिवरात्रिको अवसर पारेर उनको निर्देशन रहने फिल्म 'कोशेढुंगा' को मुहूर्त गरिएको हो। मुहूर्तसँगै छायांकन समेत पनि बुधबारबाटै सुरू गरिएको छ।
काठमाडौं च्यासलस्थित सेटमा मुहूर्तसटसँगै फिल्मको छायांकन सुरू भएको निर्देशक पौडेलले बताए।
करिब एक हप्ता काठमाडौंमा छायांकन गरेपछि निर्माण यूनिट बाँकी छायांकनका लागि स्याङ्जा जानेछ।
यो फिल्ममा सुरक्षा पन्त, आर्यन सिग्देल, सरोज खनाल, विशाल पहारी, शेखर चापागाईं, सिरू विष्ट, उद्वव सापकोटा, सन्ध्या राना, सविता रेग्मी, सविन कट्टेल, विकास खनाल लगायत कलाकारहरूको अभिनय रहनेछ।
नरदेवी फिल्मस्को प्रस्तुति रहेको फिल्ममा प्रेविल कँडेल र किशोर अनुराग निर्माताको रूपमा छन्। कार्यकारी निर्मातामा दिनेश खड्का छन्। फिल्म बाबु श्रेष्ठले खिच्नेछन् भने सुरेन्द्र पौडेलले सम्पादन गर्नेछन्।
'कोशेढुंगा' २०८२ मा रिलिज हुने निर्माण पक्षले जनाएको छ।
