बुधबार रिलिज हुन लागेको फिल्म 'मायावी' को काठमाडौंमा प्रिमियर गरिएको छ।
सोमबार बेलुका कीर्तिपुरस्थित कीर्तिपुर सिनेप्लेक्समा आयोजित प्रिमियरमा पुगेर अभिनेता राजेश हमाल, पूर्व मिस नेपाल उषा खड्गी सहितका कलाकारहरूले यो फिल्म हेरे।
फिल्म हेरेपश्चात सञ्चारकर्मीसँग कुरा गर्दै अभिनेता राजेश हमालले 'मायावी' ले सिंगो फिल्म क्षेत्रलाई नै चलायमान बनाउन सक्ने प्रतिक्रिया दिए।
उनले भने– 'यो फिल्ममा हरेक कुरा छ। फिल्मको कथावस्तुले मन छुन्छ। गीतसंगीतको प्रयोग निकै उत्कृष्ट तरिकाले गरिएको छ। ब्याकग्राउन्ड म्युजिक पनि उत्कृष्ट छ। कलाकारहरूले पनि निकै राम्रो काम गरेका छन्। यसैले, मायावीले बजार तताउने कुरामा विश्वस्त छु।'
उनले यो फिल्म आफूले अहिलेसम्म हेरेका लभस्टोरी फिल्मभन्दा बेग्लै रहेको बताए।
'यो कसरी सकिन्छ भन्ने पनि अनुमान पाउन सकिँदैन। मान्छेको मन नै त हो नी, जता पनि जान सक्छ भन्ने देखाएको छ। यो लभस्टोरी फिल्म विशेष छ,' उनले भने।
फिल्मको प्रस्तुति निकै मन परेको बताउँदै उनले निर्देशक दीवाकर भट्टराईको तारिफ गरे।
प्रिमियरमा निर्देशक ज्ञानेन्द्र देउजा, गायक रामकृष्ण ढकाल, पूर्व मिस नेपाल उषा खड्गी, कलाकारहरू सनिषा भट्टराई, उषा उप्रेती, लगायत हल पुगेका थिए। यस्तै, फिल्मका मुख्य कलाकारहरू दीपिका प्रसाई, प्रशान्त ताम्राकार, करिष्मा श्रेष्ठ, सुशील सिटौला, राजाराम पौडेल, अन्शु महर्जन, नव–नायक समीम खान पनि प्रिमियरमा आकर्षक बनेर पुगेका थिए।
फिल्मका मुख्य अभिनेता पल शाह भने अर्को एक फिल्मको छायांकनका क्रममा रोल्पामा रहेकाले उपस्थित हुन सकेनन्।
फिल्म हेरेका अधिकांशले कथावस्तु र प्रस्तुतिले आँखा रसाएको बताए। लभ स्टोरी कथावस्तुमा एउटा मन छुने फिल्म बनेको फिल्मीकर्मीको भनाइ छ।
ध्रुव न्यौपाने, राज कटुवाल र चन्द्र पन्तको लगानीमा तयार भएको यो फिल्मले पोखराको सेरोफेरोमा रहेर कथा भन्छ। फिल्ममा प्रविन भट्टराई र करण सिंह कार्यकारी निर्माता, राजु पराजुली र सुमित वली सह–निर्माता छन्। यस्तै, क्रियटिभ सिने आर्टस्का लागि नेम महर्जन पनि यसका लगानीकर्ता हुन्। फिल्ममा राजु विक्रम थापाको डीओपी, मिलन श्रेष्ठको सम्पादन, शम्भुजित बास्कोटा र एसडी योगीको संगीत, कविराज गहतराज र प्रविण सिंहको कोरियोग्राफी छ।
देशभरका मल्टिप्लेक्सले यो फिल्मको बुकिङ खुलाइसकेका छन्।
