एक समय सिरियलमा स्थापित थुप्रै कलाकारहरू यतिबेला फिल्ममा जमेका छन्। उनीहरू सिरियल छाडेर फिल्ममा काम गरिरहेका छन्। सिरियलबाट ख्याति कमाएका कलाकारहरूले फिल्ममा फड्को मार्ने क्रम जारी नै छ।
यतिबेला चर्चित हास्य सिरियल 'सक्किगोनि' टिमले पनि फिल्म 'लाज शरणम्' बनाएको छ। कुमार कट्टेल (जिग्री) निर्देशित यो फिल्म यही फागुन १४ गतेदेखि प्रदर्शनमा आउँदैछ।
यसैबीच सेतोपाटीसँगको कुराकानीमा 'सक्किगोनि' का निर्देशकद्वय कुमार र अर्जुन घिमिरे (पाँडे) ले आफूहरूको कलाकारिताको पहिलो खुड्किलो सिरियल भएकाले यसलाई छाड्नेबारे सोच्न पनि नसक्ने बताएका छन्।
कतिपय दर्शकहरूले फिल्म चल्यो भने सिरियललाई निरन्तरता दिनुहुन्न होला भनेर आफूलाई सोध्ने गरेको बताउँदै अर्जुन भन्छन् 'फिल्मको सफलता/असफलतासँग सिरियलको सम्बन्ध हुँदैन्। सक्किगोनि हाम्रो मात्र नभइ दर्शकको हो। त्यसमाथि सिरियलमा ठूलो टिम भएकाले यसलाई रोक्नेबारे सोच्न सक्दैनौं।'
उनको कुरामा कुमारले थपे, 'जहाँबाट हामीले कलाकारिताको यात्रा सुरू गर्यौं। अथवा जुन प्लेटफर्मबाट हामीलाई दर्शकहरूले यति धेरै माया दिनुभयो र फिल्म बनाउन समेत इन्करेज गर्नुभयो। त्यसलाई बिर्सन सक्दैनौं। सिरियललाई निरन्तरता दिन्छौं।'
अर्जुन आफूहरूलाई सिरियलले नै देशमै केही गर्ने वातावरण सिर्जना गरिदिएको बताउँछन्। उनले भने, 'यदि सिरियल थिएन् भने नेपालमा हुँदैनथ्यौं वा नेपालमै भए पनि संघर्ष गरिरहेका हुन्थ्यौं। वा अरू केही काम गरिरहेका हुन्थ्यौं होला।'
अर्जुनका अनुसार सक्किगोनिको तेस्रो सिजन सकिने तयारीमा छ। फिल्म आएको केही महिनापछि सिरियल नयाँ सिजनको तयारीका लागि केही समय ब्रेक हुन सक्ने उनले बताए।
कुमारले भने, 'पहिलो, दोस्रो र तेस्रो सिजन गर्दा पनि केही समय ब्रेक भएको थियो। सिजन ४ को तयारीका लागि पनि केही समय ब्रेक हुनसक्छ।'
कुमार र अर्जुनका अनुसार सिरियलमा ४०/५० जनाको टिम जोडिएको छ। काभ्रे पुगेर छायांकन गर्दै आएका छन्। एजेन्सीसँगको खर्चको हिसाबले हेर्दा भोलिका दिनमा बजारले नधान्ने भयो भने खुम्चिएर काम गर्नुपर्ने बाध्यता भने आउनसक्ने अर्जुनले बताए।
त्यस्तो अवस्थामा आफूहरूले चाहेर मात्र स्तरीय सिरियल ल्याउन नसक्ने अवस्था हुनसक्ने उनको भनाइ छ।
'त्यतिबेला सल्लाहले केही निर्णय गर्ने अवस्था हुनसक्छ,' कुमारले भने।
हेर्नुहोस्, जिग्री र पाँडेको भिडिओ कुराकानी—
