अभिनेत्री सुरक्षा पन्तले केही समयअघि सेतोपाटीसँगको कुराकानीमा बिहे र करिअरबारे चर्चा गरेकी थिइन्।
राम्रो जीवनसाथी भयो भने घरको आधाभन्दा धेरै काम अरूले सम्हालिँदा आफ्नो काममा केन्द्रित हुन पाइने उनको भनाइ छ।
'एक्लै हुँदा घर र पेसागत जीवन सबै आफैले मिलाउनुपर्ने हुन्छ। सहयात्री भयो भने काम बाँड्न मिल्छ,' उनले भनिन्, 'मैले त्यस्तै जीवनसाथी पाएकी छु। हामी एकअर्कासँग रचनात्मक सल्लाह मागिरहेका हुन्छौं। मेरो विवाहको राम्रो पक्ष भनेको रचनात्मक संयोजन हो।'
थुप्रै अभिनेत्री विवाहपछि अभिनयबाट पलायन भएका छन्। तर सुरक्षा पन्त यसमा फरक मत राख्छिन्। विवाह गर्यो भन्दैमा काम छाड्न नहुने उनी बताउँछिन्।
'बिहे गरेपछि कामबाट ब्रेक लिन आवश्यक छ। तर आफ्नो काममै असर पुग्ने गरी होइन। आफ्नो जीवनसाथी र नयाँ परिवारका लागि केही समय दिनु आवश्यक हुन्छ। म पनि परिवारलाई समय छुट्याउने प्रयास गरिरहेकी छु। तर काम गर्नै छोड्ने मान्यता राख्दिनँ,' उनले भनिन्।
सुरक्षाले २०७९ फागुनमा बिहे गरेकी थिइन्। उनका श्रीमान मानव सुवेदी पनि कला क्षेत्रमै आबद्ध छन्।
सुरक्षाले केही गम्भीर फिल्महरूमा काम गरेकी छन्। उनको 'बहाव' फिल्म मनोवैज्ञानिक थियो। फिल्ममा सुगाको मुख्य भूमिका भएकाले सुरूमा यसको नाम 'ग्रिन बर्ड' राखिएको थियो।
पिँजडामा राख्दा सुगाको मनोविज्ञान कस्तो हुन्छ, बाहिर निकाल्दा कस्तो हुन्छ, यी सबैलाई प्रतिबिम्ब मानेर सन्ध्या पात्र निर्माण गरिएको थियो। सुरक्षाले त्यही पात्रको भूमिका गरेकी थिइन्।
उनको अर्को फिल्म 'बुलाकी' कर्णाली प्रदेशको जारी प्रथामा आधारित थियो।
सुरक्षाले फिल्म 'अझै पनि' बाट अभिनयमा डेब्यू गरेकी हुन्। उनले 'गोपी, घर, आमा, के घर के डेरा, धनपति' लगायत फिल्ममा अभिनय गरेकी छन्।
पूरा भिडिओ हेर्न यहाँ क्लिक गर्नुहोस्:
