सेलेब्रेटी भएपछि जस्तोसुकै नकारात्मक टिप्पणी सहनुपर्छ भन्ने आमधारणा रहेको अभिनेत्री स्वस्तिमा खड्काले बताएकी छन्।
'तिमी पब्लिक फिगर हो, सेलेब्रेटी हो, त्यसैले तिमीले जस्तोसुकै नकारात्मक कमेन्ट सहेर जानुपर्छ भन्ने धेरैको सोच देखिन्छ। तर सेलेब्रेटी वा पब्लिक फिगर हुँदैमा नकारात्मक टिप्पणीले फरक पार्दैन भन्ने हुँदैन,' उनले सेतोपाटीसँगको एक अन्तर्वार्तामा भनिन्, 'हामीलाई पनि नराम्रो कमेन्टले असर पार्छ, किनभने हामी पनि मान्छे हौं।'
उनले केही उदाहरण पनि दिइन्। खासगरी सिनेमामा बिकनी लगाउँदा आउने नकारात्मक टिप्पणी वा अश्लील शब्द प्रयोग गरेर गरिने टिप्पणीले असर पार्ने उनको भनाइ छ।
यति हुँदाहुँदै पछिल्लो समय आफूलाई त्यस्ता प्रतिक्रियाले असर पार्न छाडेको उनी बताउँछिन्।
स्वस्तिमाले यसो भन्नुको पछाडि पनि कारण छ।
१९ वर्ष उमेरबाट फिल्म खेल्न थालेकी स्वस्तिमाले सुरूका दिनमा सामाजिक सञ्जाल र व्यक्तिगत रूपमा निकै सकारात्मक प्रतिक्रियाहरू पाएकी थिइन्। ती प्रतिक्रियाले आफूलाई उत्साहित बनाएको उनी बताउँछिन्।
तर जब निश्चल बस्नेतसँग बिहेको कुरा चल्यो, त्यसपछि एकैचोटि नकारात्मक टिप्पणीको ओइरो लाग्न थाल्यो।
'बिहेको कुरा चल्नासाथ मान्छेहरूले आ-आफ्नो ढंगले अनुमान लगाए। स्वस्तिमाले यो-यो कारणले निश्चलसँग बिहे गर्न लागेकी हो भनेर कुरा काट्न थाले,' उनले भनिन्, '१९-२० वर्ष उमेरमै एकदमै धेरै नकारात्मक टिप्पणी भोगेर आएकाले अचेल त्यस्ता टिप्पणीले मलाई कम असर गर्छ।'
उनले अगाडि भनिन्, 'मैले के बुझेकी छु भने, त्यस्तो कमेन्ट आउने अधिकांश प्रोफाइल फेक हुन्छन्। अचेल मेरो ब्लक लिस्टमा एकदमै धेरै ब्लक एकाउन्ट छन्। त्यसमा धेरै त फेक एकाउन्टहरू नै छन्।'
