पोखरामा सन् १९९० को दशकमा जन्मिएका ७ वटा सांगीतिक ब्याण्डहरूले शनिबार एउटै स्टेजबाट सांगीतिक प्रस्तुति दिने भएका छन्।
‘ब्याक टु नाइन्टिज: विरासतलाई फर्केर हेर्दा’ कार्यक्रम अन्तर्गत पोखरामा जन्मिएका सांगीतिक ब्याण्डहरू कन्दरा, ब्रो–सिस, द भागाबोण्ड, लेकाली, डि–मर्चा, मध्यान्ह र देउराली ब्याण्डले ९० का दशकमा सिर्जना गरेका गीत संगीत प्रस्तुत गर्नेछन्।
पोखरा सांगीतिक कलाकार संघ र गण्डकी प्रज्ञा प्रतिष्ठानको सहकार्यमा आयोजित कन्सर्टको सम्पूर्ण तयारी पूरा भएको कार्यक्रम संयोजक एवं प्रतिष्ठानका सदस्यसचिव मनकुमार श्रेष्ठले जानकारी दिए।
‘पोखरामा जन्मिएका सबै ब्याण्डहरूलाई एउटै मञ्चबाट सांगीतिक प्रस्तुति दिने कार्यक्रमको तयारी पूरा भएको छ,’ उनले भने, ‘विरासतलाई फेरि फर्काउन यो कार्यक्रमले मलजल गर्नेछ।’
उनका अनुसार पोखरामा जन्मिएका नेपथ्य, परिवेश लगायत केही ब्याण्ड भने छुटेका छन्।
उक्त ब्याण्ड यतिबेला सांगीतिक प्रस्तुतिका क्रममा विदेशमा रहेका र केही ब्याण्डका कलाकार विदेशमै विस्थापित भएकाले छुटेको उनले जानकारी दिए।
शनिबार साँझ ५ बजेदेखि १० बजेसम्म नयाँ बजारको प्रदर्शनी केन्द्रमा आयोजित कार्यक्रममा ९० को दशकमा सिर्जना गरिएका गीतहरू प्रस्ततु गरिनेछ।
कन्सर्टमा कन्दरा ब्याण्डले चर्चित गीतहरू तगारोमा रूमाल राखी, तिमी पारी त्यो गाउँमा, लेककी हे माया गीत प्रस्तुत गर्ने गायक विवेक श्रेष्ठले जानकारी दिए।
डि–मर्चा ब्याण्डका भाष्करध्वज श्रेष्ठले झ्याम्म झ्याम्म, कैलाशैमा, झ्याम्मै चौतारी र तारा खस्यौली गीत गाउनेछन्।
पोखरा सांगीतिक कलाकार संघका अध्यक्षसमेत रहेका लेकाली ब्याण्डका हर्कराज गुरुङ –भाई र नवीन गुरुङले यो मुटुमा, सपनीमा, कहाँबाट र पहिलो नजर गीत गाउनेछन्।
कार्यक्रममा देउराली ब्याण्डका शान्त बज्राचार्यले ढुंगे साँघुको मेलामा, लुकीचोरी र सररर हावा गीत प्रस्ततु गर्नेछन्।
सांगीतिक कार्यक्रममा पोखराकै अर्को ब्याण्ड ब्रो–सिसका भोकलिष्ट प्रकाश रानाले चाईना कम्पनी र जादू तिम्रो नजरले बोलका गीत प्रस्तुत गर्नेछन्।
कार्यक्रममा मध्यान्ह ब्याण्डका गायक कर्णदास र कुमार गुरुङले जिन्दगीको के भरोसा र मन मनै मन पराई सकेछु गीत गाउनेछन् भने भागाबोण्ड ब्याण्डका गायक श्यामसुङ तामाङले यो जिन्दागानी, उकाली चढी बोलका गीत गाउनेछन्।
पोखराको सांगीतिक माहौललाई पुनजागृत गराउन उक्त कार्यक्रम कोशेढुङ्गा हुने आशा आयोजक पोखरा सांगीतिक कलाकार संघका अध्यक्ष हर्कराज गुरूङले बताए।
‘९० को दशकमा पोखराले नेपाली संगीतमा लोकपप विधा ल्याएर हस्तक्षेप गरेको थियो। त्यतिबेला जन्मिएका सबै गीतहरू अझै पनि हिट छन्,’ उनले भने, ‘फेरि पोखरालाई संगीतको केन्द्र बनाउन सकिन्छ। विरासत फर्काउन यो कार्यक्रम कोशेढुङ्गा हुनेछ।’
