फिल्म 'फेरि रेशम फिलिली' का दुई पोस्टर सार्वजनिक गरिएको छ।
फिल्मको गीत रिलिजको पूर्वसन्ध्यामा निर्माणपक्षले पोस्टर ल्याएको हो।
फिल्मको पहिलो गीत 'फेरि जालमा' भोलि बिहीबार रिलिज गर्ने तयारी छ। सो गीतको अडिओ/भिडिओको सानो झलक निर्माणपक्षले रिलिज गरिसकेको छ।
सार्वजनिक पोस्टर रमाइला छन्। एउटामा फिल्मका तीन प्रमुख कलाकार विनय श्रेष्ठ, कामेश्वर चौरासिया र सुपुष्पा भट्टलाई प्रस्तुत गरिएको छ। यसमा विनयलाई भूँईमा पछारिएको अवस्थामा हातमा पासपोर्ट देखाइरहेको देख्न सकिन्छ।
उनीमाथी अभिनेत्री सुपुष्पाले आक्रोशपूर्ण शैलीमा बन्दुक ताकिरहेकी छन् भने कामेश्वरले दुई हात जोडेर माफी मागिरहेको देख्न सकिन्छ। पोस्टरको नेपथ्यमा नेपालको धरहरा र अमेरिकाको 'स्ट्याचु अफ लिबर्टी' देखाइएको छ।
अर्को पोस्टरमा फिल्मका सबै कलाकारहरूलाई क्यारेक्टर लुक्समा देखाइएको छ। फिल्मको कथा आफ्नो पूर्व सिक्वेलझैं मनोरञ्जनपूर्ण हुने अनुमान गर्न सकिन्छ।
'फेरि रेशम फिलिली' लाई निरोज महर्जनले लेखन तथा निर्देशन गरेका हुन्।
फिल्ममा विनय, सुपुष्पा, कामेश्वरसहित नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको अभिनय छ। यो फिल्ममा ‘रेशम फिलिली’ का निर्देशक प्रनव जोशी र अभिनेत्री मेनुका प्रधान बाहेकको अधिकांश टिम पुरानै छ।
वि मोसन पिक्चर्सको सहकार्यमा सिनेमा आर्टको निर्माण रहेको फिल्मको निर्माता रौनक विक्रम कंडेल हुन्।
फिल्ममा निर्देशक महर्जन र आकाश बरालको पटकथा, सुशन प्रजापतीको छायांकन र सुरेन्द्र पौडेलको सम्पादन छ। कार्यकारी निर्मातामा सुरज बम ठकुरी र सह–निर्मातामा एनी थापा छन्।
फिल्म फागुन १४ गतेदेखि प्रदर्शनमा आउने तयारीमा छ। यसलाई काफिया फिल्मस् र कुवेर सिने डिष्ट्रीब्युसनले वितरण गर्नेछन्।
