सर्वकालिन ब्लकबस्टर फिल्म 'पूर्णबहादुरको सारंगी' का निर्देशक सरोज पौडेलले यसको दोस्रो श्रृंखला घोषणामा असन्तुष्टि जनाएका छन्।
'पूर्णबहादुरको सारंगी २' को औपचारिक निर्माण घोषणा भएसँगै निर्देशक पौडेलले असन्तुष्टि व्यक्त गर्दै यसलाई कमाइ खाने भाँडो नबनाउन सुझाव दिएका छन्।
'पूर्णबहादुरको सारंगी' सफलताको खुसी साट्न आइतबार आयोजित कार्यक्रममा यसका निर्मातामध्येका एक विनोद पौडेलले 'पूर्णबहादुरको सारंगी २' को औपचारिक निर्माण घोषणा गरेका थिए।
त्यसको अर्कोदिन निर्देशक पौडेलले फेसबुकमा लेखेका छन्, 'पूर्णबहादुरको सारंगीले कोरेको इतिहासलाई इतिहास नै बनाई सम्मानपूर्वक राखौं। यसलाई कमाइ खाने भाँडो बनाउन खोज्दा आफ्नै हातले बनाएको इतिहास आफै भत्किन सक्छ।'
उनले यो फिल्मको दोस्रो भागमा आफूले काम नगर्ने पनि बताएका छन्।
उनले लेखेका छन् 'सके सम्म २/३/४/६ बनाउन तिर नलागेर आफ्ना कथाहरू फरक शैलीमा भन्नुपर्दछ भन्ने मेरो मान्यतालाई नै निरन्तरता दिँदै छु। कोशेढुंगामार्फत मैले मेरो कथाहरू भन्दै छु।'
निर्देशक पौडेल यतिबेला फिल्म 'कोशेढुंगा' निर्देशनको तयारीमा छन्।
उनले 'पूर्णबहादुरको सारंगी २' मा आफूले काम नगरे पनि आवश्यक प्रक्रिया पुरा गरेर अघि बढ्न आग्रह गरेका छन्। पहिलो शृंखलाले स्थापित गरेको गरिमा जोगाउन पनि उनको आग्रह छ।
