डकुड्रामा 'मौन' को पोस्टर सार्वजनिक गरिएको छ।
सेलिब्रेटी टाइम्सको ब्यानरमा निर्माण गरिएको यस फिल्मलाई विभिन्न फेस्टिभल, च्यारिटी शो तथा विशेष प्रदर्शनमार्फत दर्शकमाझ पुर्याउने गरी निर्माण गरिएको जनाइएको छ।
पोस्टरमा फिल्मकी मुख्य पात्र प्रार्थना पाठकलाई फिचर्ड गरिएको छ।
रिसर्चमा आधारित भनिएको यो डकुड्रामाका निर्देशक तथा निर्माता रामजी ज्ञवाली हुन्। उनले वास्तविक जीवनसँग जोडिएको कथामा फिल्म बनाएको बताएका छन्।
फिल्मको कथाबारे नखुलाइए पनि महिला हिंसाको विषयमा रहेर फिल्म बनेको पोस्टरबाट अनुमान गर्न सकिन्छ।
यसको कथा निर्देशक रामशरण पाठकले लेखेका हुन्। सिनेमाटोग्राफी शंकल्प भुजेल, सहायक निर्देशन वसन्त अधिकारी तथा पोस्टर फोटोसुट कुवेर डंगोलको छ भने पोस्टर टौवा स्टुडिओले तयार पारेको हो।
फिल्ममा प्रार्थनासहित सरोज खनाल, हिउँवाला गौतम, ओजस्वी विक्रम विस्ट, दिवस नाथ लगायतको समेत अभिनय छ।
फिल्मको सहायक निर्माता हरि क्षेत्री भुपेन्द्र हुन्। फिल्मको प्राविधिक पक्षमा भरत कंडेलले साउण्ड डिजाइनिङ, राजेन्द्र मोक्तानले कलर ग्रेडिङ र नहकुल खड्काले सम्पादनको काम गरेका छन्।
यस डकुड्रामालाई नेपालका विभिन्न स्कुल, कलेज तथा संघसंस्थाहरूमा विशेष शोमार्फत दर्शकमाझ ल्याइने बताइएको छ।
