काठमाडौंमा आयोजना हुने आठौं नेपाल अन्तर्राष्ट्रिय चलचित्र महोत्सवमा राष्ट्रिय प्रतिस्पर्धा अन्तर्गत फिल्म 'सानो संसार' छनिएको छ।
नेपाली फिचर फिल्म प्रतिस्पर्धामा छानिएको फिल्म 'भुठान' का निर्माताहरूले सबैलाई जानकारी नभएको भन्दै असन्तुष्टि व्यक्त गरेपछि सो फिल्मलाई महोत्सवबाट हटाइएको छ। उक्त फिल्मलाई हटाएपछि 'सानो संसार' छानिएको हो।
चैत ७ देखि ११ गतेसम्म आयोजना हुने महोत्सवमा ४० देशका ८७ फिल्म देखाउने तयारी रहेको आयोजक संस्था नेपाल चलचित्र तथा सांस्कृतिक प्रतिष्ठानले जनाएको छ।
अन्तर्राष्ट्रिय डकुमेन्ट्री विधाको प्रतिस्पर्धामा नेपालको 'हिमालयन ड्रिम्स' सहित अमेरिका, भारत, बंगलादेश, बेल्जियम, चिली, न्यूजिल्याण्डका ९ फिल्म छनोट छन् ।
छोटो फिल्मको अन्तर्राष्ट्रिय प्रतिस्पर्धाको विधामा ३२ फिल्म छन् । यो विधामा मलेसियाको 'चाइना बिस्ट', अस्ट्रेलियाको 'ड्रिम लिंक', चीनको 'अ इयर अपार्ट' लगायत छन् ।
