फिल्म 'पूर्णबहादुरको सारंगी' फ्रेम्ड निर्माता विनोद पौडेलले एकसाथ दुइटा फिल्म निर्माणको घोषणा गरेका छन्।
'पूर्णबहादुरको सारंगी' सुपरहिट बनेपछि आइतबार सफलताको खुसी साट्न आयोजित कार्यक्रममा 'पूर्णबहादुरको सारंगी २' सँगै 'रोल नं. १' निर्माणको घोषणा गरिएको हो।
आयोजित कार्यक्रममा निर्माता कम्पनी सभेन सिजको नयाँ लोगो समेत सार्वजनिक गरियो।
चलचित्र विकास बोर्डका अध्यक्ष दिनेश डीसीले लोगोसहित फिल्मको टाइटल अनावरण गरेका हुन्। कार्यक्रममा फिल्मको टिमलाई नगदसहित कदरपत्रले सम्मान समेत गरियो।
सरोज पौडेल निर्देशित 'पूर्णबहादुरको सारंगी' ले नेपाली बक्सअफिसबाट मात्रै करिब ५० करोड रुपैयाँ ग्रसकलेक्सन गरेको थियो।
विनोद पौडेल र प्याट्रिक सुवेदीले यसका निर्माता हुन्। फिल्ममा विजय बराल, प्रकाश सपुत, अञ्जना बराईली, अलिसा बास्तोला, मुकुन भुसाल, बुद्धि तामाङ लगायतको अभिनय छ।
