अरूण लामा लिखित तथा निर्देशित फिल्म 'डोरी' को नयाँ पोस्टर सार्वजनिक भएको छ।
सार्वजनिक पोस्टरमा फिल्मका प्रमुख कलाकारहरू प्रवीण खतिवडा, शिशिर वाङ्देल, प्रकाश घिमिरे, अरूण लामा, अञ्जना बराइली, राज पौडेल, कविता आले, नूतन, राज थापालगायत कलाकारको अभिनय छ।
पोस्टरको केन्द्रमा अभिनेत्री बराइलीलाई पारम्परिक पोसाकमा मुस्कानसहित देखाइएको छ, जसले फिल्मको सांस्कृतिक पृष्ठभूमिको संकेत गर्छ। अन्य पात्रहरूको विभिन्न भावभंगीमा देखिएको उपस्थिति कथावस्तुमा रहेको विविधतालाई दर्साउँछ।
पोस्टरमा मुख्यतः दुई पात्रहरूलाई विशेष रोचक ढंगले प्रस्तुत गरिएको छ- एक पात्रले हास्यव्यंग्य झल्काउने भावमा छ भने अर्को पात्र अत्यन्त आक्रोशित मुद्रामा देखिन्छ। यसले कथावस्तुमा हास्य, संघर्ष, र गम्भीर भावनाहरूको मिश्रण रहेको संकेत दिन्छ। पोस्टर डिजाइन विजय बस्यालले गरेका हुन्।
यसमा वीरेन्द्र सिंह कुशवाहाको पनि अभिनय रहेको छ। फिल्ममा निर्माता दिनेश भट्टराई हुन् भने कार्यकारी निर्माताको रूपमा राज थापाले जिम्मेवारी सम्हालेका छन्।
'डोरी' मा स्क्रिप्ट डाक्टर मनोज पण्डित हुन् भने मुख्य सहायक निर्देशक दिनेश बहादुर रावत, एक्सन निर्देशक राजु तामाङ, संगीत निर्देशक राजनराज सिवाकोटी, कला निर्देशक रोशन दिवाना, स्थल ध्वनि रेकर्डिस्ट किशोर खनाल, सम्पादक मिलन श्रेष्ठ, रंग संयोजक रेनीश फागो रहेका छन्।
यो फिल्म चैत १५ गतेदेखि प्रदर्शन हुनेछ।
